Англияның «Лестер Сити» клубы ойын формасының кеудесінде логотипі тұрған титулдық демеушісі — BC Game криптовалюта компаниясымен келісімшартты мерзімінен бұрын бұзды. Оған компания қараша айының басында өз амбассадоры етіп тағайындаған ресейлік порноактриса Ева Элфиге қатысты дау себеп болды. Бұл шешім туралы клуб хабарлады.
«Лестер» мен BC Game «коммерциялық серіктестікті дереу тоқтату туралы өзара келісімге келді», делінген клуб мәлімдемесінде. Онда тараптардың коммерциялық басымдықтары алдағы уақытта сәйкес келмейтінін мойындайтыны да айтылған. Клуб компанияға екі жарым жылдық ынтымақтастығы үшін алғыс айтты. Келісімшарттың сомасы жарияланбады, жаңа титулдық демеуші әзірге жоқ.
Элфидің тағайындалуы «Лестер» жанкүйерлерінің қатты сынына ұшырады. Foxes Trust жанкүйерлер бірлестігі бұған дейін де букмекерлік компанияның демеушілігіне қарсы болған, ал амбассадор туралы жаңалықтан кейін клуб өз құндылықтарынан бас тартып жатыр деп мәлімдеп: «Енді біз осындаймыз ба?» — деген сұрақ қойды. Енді «Лестер» 21 қазаннан бері сатып алынған BC Game логотипі бар жейделердің, тіпті киілген және аты жазылғандарының да ақшасын қайтарады немесе оларды ауыстырып береді. Мұны 2 желтоқсанға дейін жасауға болады.
Бұл — қиын кезеңдегі «Лестер» үшін тағы бір соққы. 2015/16 маусымындағы Англия чемпионы екі жыл қатарынан — алдымен Премьер-лигадан, кейін Чемпионшиптен төмен түсіп, қазір елдегі деңгейі бойынша үшінші дивизион — Лига Біреуде ойнап жүр. Команданы Рассел Мартин жаттықтырады.



