Үндістан премьер-министрі Нарендра Моди алтынның арзандауына оның үндістандықтарды қажеттілік болмаса металл сатып алмауға шақыруы да ықпал етті деп мәлімдеді. Ол бұл туралы 21 қарашада, сенбі күні Лакхнауда кәсіптік-техникалық оқу орындарының түлектеріне диплом табыстау рәсімінде айтты, деп хабарлайды News18. «Мен сияқты қарапайым адам алтынды азырақ сатып алуды сұрады — отандастар алтынды азырақ сатып алды, алтын бағасы түсті. Бүгін адамдар маған: „Моди-джи, сіз айттыңыз, біз кеңесіңізді тыңдадық, ақшамыз сақталып қалды“, — деп жатыр», — деді премьер. Ол өз үндеуін бұрынғы премьер-министр Лал Бахадур Шастридің 1960-жылдары азық-түлік тапшылығы кезінде үндістандықтарды бір мезгіл тамақтан бас тартуға шақырған өтінішімен салыстырды.
Моди алтын сатып алмауға алғаш рет мамырда шақырды: мақсаты — Иранмен соғыс және мұнайдың қымбаттауы жағдайында валютаны үнемдеу. Үндістан — Қытайдан кейінгі әлемдегі екінші ірі алтын тұтынушы және металдың барлығына жуығын шетелден әкеледі: өткен қаржы жылында оның импортына 72 млрд доллар, шамамен 32,8 трлн теңге жұмсалды.
Премьердің сөзін Делидегі саудагерлер бірлестігі — Сауда және өнеркәсіп палатасы (CTI) қолдады. Палата Модиге 22 қарашада жолдаған хатында мынадай есеп келтірді: премьер кеңес берген кезде Үндістанда бір келі алтын 19 млн рупий тұрған, ал қазір 12,5 млн рупий тұрады, яғни 6,5 млн рупийге, шамамен 32 млн теңгеге арзандаған, деп хабарлайды ANI агенттігі. «Жүз мыңдаған зергер қарызға батып, банкроттыққа ұшырар еді», — делінген хатта. Сол палата қыркүйекте бұл үндеу зергерлерге соққы болатынын ескерткен еді: оның бағалауынша, Үндістанда алтын тұтыну жылына 800 тоннадан 500 тоннаға дейін азаюы мүмкін еді.

Бұл тақырыпты саясаткерлер де қолға алды. Билеуші «Бхаратия джаната партиясының» өкілі Прадип Бхандари оппозициядағы Үндістан ұлттық конгресі премьердің үндеуін «өлім үкімі» деп атағанын еске салып: «Конгресс алтын сатып алу туралы өтірік таратқаны үшін елден кешірім сұрай ма?» — деп сұрады, деп хабарлайды IANS.
Алайда алтын бүкіл әлемде арзандап жатыр. Өткен аптада бір унция шамамен 9%-ға арзандап, 20 қарашада, жұма күні шамамен 3530 доллар тұрды, ал қаңтардың соңында оның бағасы рекордтық деңгейге — 5600 долларға жуықтаған еді. Үндістанның Livemint іскерлік басылымы бұл құлдырауды жасанды интеллект компаниялары акцияларының сатылуымен және АҚШ Федералдық резервтік жүйесі мөлшерлемені тағы көтереді деген күтумен байланыстырады: мөлшерлеме жоғары болғанда пайыз әкелмейтін металдың инвесторлар үшін тартымдылығы төмендейді.
Қазақстан үшін алтынның арзандауы Ұлттық банк резервтеріне байланысты маңызды: банк деректері бойынша, елдің алтын-валюта резервінің шамамен 78%-ы алтыннан тұрады, сондықтан олардың долларлық құны баға соңынан төмендейді.



