Сенбі, 21 қарашада Шығыс Тимор мен Индонезияның Малуку аралдары арасындағы Банда теңізінде 6,8 магнитудалы жер сілкінісі болды. Дүмпу Астана уақытымен сағат 14:42-де тіркелді, эпицентр Тимордың Лоспалос қаласынан солтүстік-шығысқа қарай 105 км жерде, 132 км тереңдікте болған, деп хабарлады АҚШ Геологиялық қызметі (USGS).
Индонезияның Метеорология, климатология және геофизика агенттігі BMKG алдымен магнитуданы 7,2 деп бағалады, кейін оны 6,9-ға дейін нақтылап, тереңдігін 156 км деп көрсетті. Агенттіктің дерегінше, ошақ теңіз астында, Оңтүстік-Батыс Малуку округінен солтүстік-батысқа қарай 27 км жерде орналасқан. Жер сілкінісінің ошағы терең болды, оған тектоникалық плита ішіндегі жыныстардың деформациясы себеп болған. Агенттік цунами қаупі жоқ екенін атап өтті.
Ең күшті дүмпу округтің әкімшілік орталығы Тиакурда сезілді: онда сілкініс MMI шкаласы бойынша 5 балға жетті, мұндай кезде жер сілкінісін тұрғындардың барлығы дерлік сезеді. Атамбуа, Калабахи, Кефаменану қалаларында, Романг пен Бабар аралдарында дүмпу 4 балға, Купанг, Саумлаки және Вайнгапуда 3 балға дейін жетті. Тиакур ауруханасында медиктер науқастарды, соның ішінде тамшылатқыш қойылғандарды аулаға шығарды, ал қалалық базар маңындағы алаңда футбол матчы тоқтатылды, деп жазды индонезиялық Sinata.id басылымы. Кисар аралында адамдар үйлерінен жүгіріп шыққанын жергілікті тұрғын Antara агенттігіне айтып берді.
Дүмпу Австралияның солтүстігіне дейін жетті. Дарвинде жергілікті уақытпен шамамен 19:15-те қабырғалар мен шкаф есіктері дірілдеді, жер сілкінісі қаладан оңтүстік-шығысқа қарай 320 км жердегі Кэтринде де сезілді, деп хабарлады AAP агенттігі. Дарвин Индонезия аралдары мен Шығыс Тимор маңындағы жер сілкіністерінен жиі тербеледі, бірақ бұл жолы дүмпу әдеттегіден күштірек болды. Geoscience Australia геология қызметіне дүмпуді сезген адамдардан 1600-ден астам хабарлама түсті.
Geoscience Australia дүмпу туралы X әлеуметтік желісінде хабарлады:
Қаза тапқандар мен қираулар туралы ресми хабар жоқ. USGS бағалауынша, бұл жер сілкінісінен адам шығыны мен ауыр залал болу қаупі төмен — PAGER жүйесінің жасыл деңгейі. Жергілікті төтенше жағдайлар қызметі зақым туралы әзірге мәлімет берген жоқ.
BMKG өңір тұрғындарына сабыр сақтауға, тексерілмеген қауесетке сенбеуге, қайталама дүмпулерден сақ болуға және жарылған ғимараттардан аулақ жүруге кеңес берді. Негізгі дүмпуден кейін бірден агенттік афтершок тіркемеген.
Бұл — Банда теңізінде бір апта ішіндегі екінші күшті жер сілкінісі. Апта басында Индонезияның Туал қаласы маңында USGS дерегі бойынша 6,6 магнитудалы (BMKG бағалауынша 7,1) дүмпу болып, ол да Дарвинде сезілген. Ол кезде қирау болмағанын Antara хабарлаған.



