«Дюна: Үшінші бөлім» фильмінің жұлдыздары Тимоти Шаламе, Зендея, Джейсон Момоа және Аня Тейлор-Джой BBC Children in Need қайырымдылық марафоны үшін британдық жүргізуші Райлан Кларкқа әзіл жасады. Кларк актерлерден фильм туралы кәдімгі сұхбат алып отырмын деп ойлаған, ал шын мәнінде олардың жауаптарын құлаққап арқылы үш бала басқарып отырған. Бұл туралы 12 қарашада PA агенттігі хабарлады.
Балалар жұлдыздарға не айтып, не істеу керегін айтып отырды. Солардың бірінің нұсқауымен Шаламе сұхбаттың ортасында телефонына үңіліп, Кларкқа аукционда аэрогриль үшін сауда жасап жатқанын және әзірге алда келе жатқанын айтты. Кейін актер: «Жоқ, мен алдағы орнымнан айырылдым», — деп дауыстады, ал Тейлор-Джой оған: «Досым, өкінішті», — деп жауап берді. BBC алдын ала көрсеткен үзіндіде абдыраған Кларк: «Бәрі жақсы ма?» — деп сұрайды.
Әзілдің толық нұсқасы 13 қарашада Children in Need-тің басты эфирінде BBC One арнасы мен BBC iPlayer платформасында көрсетіледі. Салфордтағы MediaCityUK студиясынан берілетін хабар Лондон уақытымен сағат 19:00-де, Астана уақытымен 14 қарашада түнгі сағат 00:00-де басталады. Кешті Райлан Кларктың өзі, Алекс Джонс, Сара Кокс, Мел Гедройц және Тайлер Уэст жүргізеді.
Children in Need — BBC-дің балалар мен жасөспірімдерге қаражат жинайтын жыл сайынғы қайырымдылық марафоны. Биылғы науқан Challenge Yourself 2026 деп аталады: көрермендерден 26 санына байланысты өз сынағын ойлап тауып, соған қайырымдылық жинау сұралады. 38 жастағы Райлан Кларк — BBC Radio 2 радиосының жүргізушісі.
Дени Вильнёвтің «Дюна: Үшінші бөлім» фильмі 18 желтоқсанда прокатқа шығады. Бұл — Фрэнк Герберттің романдары бойынша түсірілген трилогияның соңғы фильмі: оқиға екінші бөлімнен он жылдан астам уақыт өткен соң, Шаламе сомдаған Пол Атрейдес галактика императоры болған кезде өрбиді. Зендея қайтадан Чани рөлін, Тейлор-Джой Полдың қарындасы Алияны ойнайды, ал Момоа гхола Хейт бейнесінде оралады. Жазда Warner Bros. фильмнің трейлерін жариялаған еді.
