Ким Кардашьянның анасы Крис Дженнер қызының өмірбаянының алғашқы нұсқасында жазылған «балалық шақтағы жарақат» туралы сөйлемге ренжігенін айтты. TMZ хабарлауынша, бұл көрініс 12 қарашада Hulu платформасында шыққан The Kardashians реалити-шоуының жаңа эпизодына енген.
Ким туыстарына «Азамат Ким» кітабының авторы, журналист Джонатан Ван Метер оның бақытты балалық шағы туралы сөзіне сенбегенін айтты. «Мен балалық шағым керемет әрі мінсіз болды дегенім үшін ол менде балалық жарақат бар деп сенімді», — деді ол. Кимнің айтуынша, алғашқы нұсқада мынадай сөйлем болған: «LOL. Балалық жарақат жоқ па? Иә, әрине, ол оны жай ғана көрмейді».
Крис бұған қатты ашуланды. «Оған жарақат туралы бөлікті алып тастасын деп айт. Мен қорландым», — деп жауап берді ол қызына. Артынша: «Менің мұрам — балаларым, сондықтан менің шындығыма ешкімнің араласқанын қаламаймын», — деп қосты. Крис сондай-ақ отбасындағы балалық шақтың ең үлкен жарақаты Toys «R» Us ойыншық дүкендері желісінің жабылуы болғанын айтып әзілдеді.
Апа-сіңлілері Кимді қолдады. «Неге ол сенің сөзіңді сол күйінде қабылдай алмайды?» — деп сұрады Хлои Кардашьян. Кортни Кардашьян: «Бізде қандай да бір терең, қараңғы жарақат болды деп ойламаймын, сондықтан біреу бізде ондай болды деп айтуға тырысса, мен де ашуланар едім», — деді.
Крис кітап идеясының өзіне де наразы. Эпизодта ол Кимнің отбасы тарихын бөтен адамға сеніп тапсырғанын айтады: «Менің ойымша, өз тарихыңды өзің айтқаның дұрыс. Біздің тарихымызды басқа ешкімнің айтуының қажеті жоқ». Ким кітаптан бас тартпайтынын жеткізді: «Мен оны қолдаймын». Жарақат туралы сөйлем кітаптың соңғы нұсқасынан алынып тасталғаны белгісіз.
Ким Кардашьян — реалити-шоу жұлдызы, SKIMS киім брендінің негізін қалаушы. «Азамат Ким» (Citizen Kim: The Woman Who Created the Future) өмірбаяны қазан айында жарық көрді. Vogue және Vanity Fair басылымдарына мақала жазған Ван Метер кітап үстінде бес жыл жұмыс істеп, Кимнің өзімен және оның жақындарымен талай рет сөйлескен. Кітап эпизод шыққанға дейін-ақ дау тудырған еді: онда Кристің Кимнің әкесі, адвокат Роберт Кардашьянмен некеде жүргенде басқа ер адаммен көңіл қосқаны сипатталған.
