13 қарашаға қараған түні дрондар Ресейдің оңтүстігіндегі, Еділ бойындағы Волгоград қаласына жаппай шабуыл жасады. Елдегі ең ірі мұнай өңдеу зауыттарының бірі — «Лукойл-Волгограднефтепереработка» зауытында қатты өрт шықты. Жергілікті тұрғындардың айтуынша, қаладағы жарылыстар 12 қарашаның кешінде басталып, бірнеше сағатқа созылған.
Ашық дереккөздердегі суреттер мен бейнежазбаларды зерттейтін украиналық Dnipro Osint OSINT-сарапшыларының мәліметінше, соққы кемінде мұнайды алғашқы өңдейтін екі қондырғыға — ЭЛОУ-АВТ-1 мен АВТ-6-ға тиген болуы мүмкін. Екеуі бірге зауыттың алғашқы өңдеу қуатының 70%-ға жуығын береді: шикі мұнай дәл осы қондырғыларда бензинге, дизельге және басқа өнімдерге айналады. Алдын ала деректер бойынша, резервуар паркі де зақымданған. Украина Қарулы күштерінің Бас штабы зауыттың зақымданғанын әзірге ресми растаған жоқ.
Өңірдің ресейлік билігі дрон шабуылын мойындады, бірақ оның салдарын Волгоградтың оңтүстігіндегі өнеркәсіп орнындағы «жергілікті өрттер» деп қана атап, қай нысан екенін нақтыламады. Жергілікті тұрғындардың айтуынша, түнде-ақ қаладағы жанармай бекеттерінде кезек пайда болды.
Волгоград мұнай өңдеу зауыты 1957 жылдан бері жұмыс істейді және жылына 14,8 млн тоннаға жуық мұнай өңдейді — бұл Ресейдегі мұнай өңдеу зауыттары қуатының шамамен 5%-ы. Ол бензин, дизель және авиациялық отын, мазут пен битум шығарып, Ресейдің оңтүстігін мұнай өнімдерімен қамтамасыз етеді. Істен шыққан әр зауыт Ресей әскеріне жанармайдың азаюын, ал Кремль соғысты жүргізіп отырған мұнай өнімдерін сатудан түсетін қаржының кемуін білдіреді.
Украинаның қорғаныс күштері бұл зауытқа бірінші рет шабуыл жасап отырған жоқ. Ол 29 мамыр мен 31 шілдедегі дрон соққыларынан кейін қатты зақымданған, ал қазан басында, Reuters агенттігінің хабарлауынша, кезекті шабуылдан соң мұнай өңдеуді толық тоқтатқан. Ресейдің мұнай өңдеу саласына соққы беру — Украинаның өз энергетикасына қарсы лаңкестікке берген жауабы: Ресей күз бойы украиналық энергетика нысандарын зымырандармен және дрондармен атқылап, қалаларды жарық пен жылусыз қалдырып келеді.
