Канзас-Сити Федералдық резервтік банкінің басшысы Джефф Шмид 15 қарашада, жексенбі күні, АҚШ-тағы инфляция «2%-дық мақсаттан жағымсыз жоғары әрі дұрыс емес бағытта қозғалып барады» деп мәлімдеді. Гавайидегі кредиттік серіктестіктер конференциясында сөйлеген ол АҚШ Федералдық резервтік жүйесінің (ФРЖ) бағаның өсуін тежейтін құралдары бар екенін айтты, деп хабарлайды Reuters. Алайда Шмид мөлшерлемені тағы көтеруге тікелей шақырған жоқ.
Сөйлеген сөзінің басты ойы – инфляция ФРЖ-ның бақылауынан тыс емес. Шмид екі кең тараған түсіндірмеге қарсы шығады: бағаны тек жеткізілімдегі іркілістер өсіреді және жасанды интеллект инфрақұрылымын салумен байланысты сұраныс мөлшерлемеге әсер етпейді деген пікірге. «Инфляция әрқашан сұраныс пен ұсыныс арасындағы теңгерімсіздіктен туындайды», – деді ол. Оның айтуынша, ФРЖ-ның «инфляциямен күресуге әрқашан құралдары да, жауапкершілігі де бар». investingLive жазуынша, Шмидтің бағалауынша, энергия тасымалдаушылар бағасын есептемегенде де инфляция шамамен 3% деңгейінде болар еді.
Шмидтің сөзі қатаңдаудың жаңа кезеңі күтіліп отырған тұста айтылды. Инфляция бойынша күтпеген жоғары деректерден және ФРЖ-ның басқа шенеуніктерінің, соның ішінде басқарушылар кеңесінің мүшесі Кристофер Уоллердің мәлімдемелерінен кейін фьючерстер нарығы желтоқсандағы отырыста мөлшерлеменің 0,25 пайыздық тармаққа көтерілуін толық ескеріп отыр, ал 0,5 тармаққа көтерілу ықтималдығын да аз да болса жоққа шығармайды. Шмид ФРЖ төрағасы Кевин Уоршқа да сілтеме жасады, ол бұған дейін: «Бізді жұмыс күтіп тұр», – деген. Дүйсенбі күні Уоршның өзі сөз сөйлейді деп күтілуде.
Шмид биыл ФРЖ-ның мөлшерлемені өзгерту-өзгертпеуді шешетін Ашық нарық жөніндегі комитетінде дауыс бермейді. Қыркүйекте ФРЖ мөлшерлемені 0,25 тармаққа, жылдық 3,75–4,00%-ға дейін көтерді, ал қазанда өзгеріссіз қалдырды. Бұған дейін АҚШ қаржы министрі Скотт Бессент ФРЖ-ны энергетикалық күйзеліске байланысты мөлшерлемені көтермеуге шақырған.
