Жексенбі, 22 қарашада қолайсыз ауа райына байланысты Солтүстік Қазақстан және Қостанай облыстарында республикалық маңызы бар тас жолдардың төрт учаскесі бір сағатқа жабылды. Көліктің барлық түрі үшін шектеу сағат 12:00-де енгізіліп, 13:00-де қозғалыс қайта ашылды, деп хабарлады «ҚазАвтоЖол».
Шектеу мына учаскелерде қойылды:
- «Қостанай — Мамлютка», 226–406 шақырым — Қостанай облысының шекарасынан Мамлютка қаласына дейін (СҚО);
- «Петропавл — Соколовка — РФ шекарасы», 11–73 шақырым — Петропавлдан Ресей шекарасына дейін;
- «Астана — Көкшетау — Петропавл — РФ шекарасы», 491–521 шақырым — Петропавлдан Мамлютка қаласына дейін;
- «Қостанай — Мамлютка», 163–226 шақырым — Ұзынкөл ауылынан СҚО шекарасына дейін (Қостанай облысы).
Жолдардың ашылғаны туралы хабарламаны «ҚазАвтоЖол» Telegram-да жариялады.
Солтүстіктегі тас жолдардағы жағдай бірнеше күннен бері құбылып тұр. 20 қарашада таңертең «Петропавл — Соколовка — РФ шекарасы» жолының дәл осы учаскесі тұман мен көріну қашықтығының нашарлауына байланысты жабылған еді. Сол күні қолайсыз ауа райы салдарынан Астана — Павлодар тас жолы жабылды, ал жексенбіге қараған түні Ақтөбе — Қарабұтақ жолында шектеу қойылды.
22 қарашаға Астана мен 16 облыста дауылды ескерту жарияланған. Солтүстік Қазақстан және Қостанай облыстарында синоптиктер жаңбыр аралас қар, тұман, көктайғақ және екпіні 15–20 м/с жел болады деп күтуде. Жолдың ашық-жабығын «ҚазАвтоЖолдың» 1403 нөміріндегі байланыс орталығынан тәулік бойы білуге болады.



