Алматының Бостандық аудандық соты «Калипсо Плюс» туристік компаниясы мен Иран Бекжигитовтың 365info.kz порталына қойған талап арызын ішінара қанағаттандырды. Шешім 9 наурызда жарияланғанымен, порталдың адвокаты Владимир Турамшев оның көшірмесін тек 28 наурызда алды: процесс мемлекеттік тілде өткендіктен, сот шақырған маман құжатты орыс тіліне үш аптаға жуық аударған.
Сот 2015 жылғы 17 ақпанда тілші Катерина Клеменкованың атынан жарияланған «Аэропорт Алматы нарушает инструкцию безопасности ради владельцев таймшеров?» мақаласын өзгертуге міндеттеді. Шешімге сәйкес мәтіннен кейбір сөйлемдерді, бір тарауды тақырыбымен қоса толығымен, «таймшер» және «таймшерлік» терминдерін, сондай-ақ фирманың бұрынғы атауларының бірін алып тастау қажет.
Бұдан бөлек, жауапкер шешім заңды күшіне енгеннен кейін 10 күн ішінде жалған таратылған мәліметтерді теріске шығаратын материал жариялауға міндетті. Шешімге ол заңды күшіне енген күннен бастап бір ай ішінде шағым түсіруге болады.
Владимир Турамшев шешіммен келіспейді және апелляциялық шағым бермек. Оның айтуынша, заң бойынша теріске шығару мәліметтерді шындыққа сәйкес келмейді деп жария түрде мәлімдеуді білдіреді, ал «сот мақаланың бірде-бір жолын абыройға нұқсан келтіреді және шындыққа сәйкес келмейді деп таныған жоқ». Адвокат жарияланымнан мәтінді «алып тастау» нені білдіретініне де күмән келтірді: «Заң бұқаралық ақпарат құралдарын газет және электрондық деп бөлмейді».
«Калипсо Плюс» адвокаты Жандос Бухайыр мен екінші талапкер Иран Бекжигитов пікір білдіруден бас тартты.
Даулы мақалада журналист Алматы әуежайының транзиттік, яғни стерильді аймағында «Калипсо Плюс» коммерциялық компаниясы өкілдерінің қандай негізде жұмыс істейтінін сұраған. Материал 2015 жылғы ақпанда жарияланып, сол жылғы маусымда екі наразылық хат түскен. «Калипсо Плюс» компанияның «призовые лохотроны» өткізеді, яғни алаяқ ұйым деген тұжырымды теріске шығаруды сұраған. Мақалада «өзін «Калипсо плюс» ЖШС құрылтайшысы ретінде таныстырған» адам деп аталған Иран Бекжигитов өзінің компания құрылтайшысы екенін теріске шығаруды талап еткен.
Сот процесі 2016 жылғы қаңтарда басталды.
«Радиоточка» материалдары бойынша.
