Қазақстан хоккей құрамасы 5 қарашада Оңтүстік Кореяның Чонджу қаласында өтіп жатқан Азия чемпионатындағы алғашқы ойынында Жапонияны 3:2 есебімен жеңді. Турнирдің алдыңғы екі додасында да чемпион атанған қазақстандықтар атағын қорғауды өткен чемпионаттың шешуші ойынында ұтқан қарсыласын жеңуден бастады.
Жапония құрамасы 4-минутта Юто Танэитидің голымен алға шықты, бірақ бір минуттан кейін «Торпедо» шабуылшысы Максим Мухаметов есепті теңестірді. Екінші кезеңнің 28-минутында «Номад» ойыншысы Александр Мигунов Қазақстанды алға шығарды, ал 34-минутта Сюнта Кимура есепті қайта теңестірді. Жеңіс шайбасын 51-минутта «Номад» қорғаушысы Кирилл Никитин соқты. Құраманың қақпасын Владислав Нурек қорғады.
Халықаралық хоккей федерациясының (IIHF) қамқорлығымен өтетін Азия чемпионаты 2024 жылдан бері ұйымдастырылып келеді. Оған төрт құрама — Қазақстан, Жапония, Оңтүстік Корея және Қытай қатысады, әр команда әр қарсыласымен бір реттен ойнайды. IIHF күнтізбесінде биылғы турнир 2027 жылғы Азия чемпионаты ретінде көрсетілген. Қазақстандықтар келесі ойындарын 7 қарашада Қытаймен, 8 қарашада турнир иесі Оңтүстік Корея құрамасымен өткізеді.
Бас бапкер Талғат Жайлауов қараша басында 23 хоккейшіден тұратын құраманы жариялады: команданың негізін «Торпедо» мен «Номад» ойыншылары құрады, тізімде «Барыс» хоккейшілері жоқ. Құраманың бұрынғы капитаны Роман Старченко үшін бұл турнир ұлттық командадағы бапкерлік дебюті болды.
Алғашқы Азия чемпионаты 2024 жылы Алматыда өтті, онда қазақстандықтар, атап айтқанда, Қытайды 6:1 есебімен ойсырата жеңді. 2025 жылғы қарашада Бейжіңде команда шешуші ойында Жапонияны 4:3 есебімен ұтып, Азияның екі дүркін чемпионы атанды.
