Оңтүстік Қазақстан облысындағы ауыл мектебінде жанжал шықты: тәрбие ісі жөніндегі директор орынбасары Гүлнар Қошанова бүкіл сыныптың көзінше екі сегізінші сынып оқушысының адалдығына күмән келтіріп, қыздардың айтуынша, оларды гинекологқа апаруға қарсы болмаған. Бұл туралы ҚТК телеарнасы хабарлады.
«Гүлнар апай бізді пәк емес деді», – деді оқушылардың бірі. Ауылға тараған өсектен кейін қыздың жүйкесі сыр беріп, ол бір апта бойы сабаққа бармай жүр.
Бұл әңгімеге олардың сыныптасының оқиғасы себеп болған: ол жүкті екенін алты айлық кезінде ғана біліп, уланбақ болған. Үш оқушы өзара дос болмаса да, бір көшеде тұрады, енді олар туралы бүкіл ауыл біледі.
Болған жайтты барлық мұғалім талқылап жатыр, оқу процесі бұзылған, әкімшілік наразы. Директордың міндетін атқарушы Салиха Медетова мектепте жарты жылдан бері директор жоқ екенін айтты. Оның сөзінше, орынбасармен сөйлескеннен кейін қыздарға жедел жәрдем шақырылған, ал Қошанова оның тапсырмаларын орындамайды. Медетова басшылық тәжірибесі жоқ екенін мойындап, директор тағайындауды сұрайды: «Бізге тәртіп орнататын директор керек».
Гүлнар Қошанова жанжалдан кейін қан қысымы көтеріліп, ауруханаға түсті. Ол оқушылар үшін алаңдайтынын және шынымен де олардың пәктігін тексергісі келгенін айтады. Орынбасар өз әрекетін оқушылардың жүкті болу жағдайларымен түсіндіреді: оның айтуынша, жыл басынан бері үш оқушы жүкті болған, былтыр да үшеу болған. «Мұның бәрі маған қарсы ұйымдастырылған», – дейді Қошанова.
Мұғалімдер күн сайын қыздарды сабаққа оралуға көндіріп жүр, бірақ олар орынбасар жұмыстан шығарылғанда ғана келетіндерін айтады.
«Радиоточка» материалдары бойынша.
