Алматы автобустарының жолаушылары «Оңай» электрондық төлем жүйесін айналып өтуді, тіпті терминалдарды смартфонмен өшіруді үйренген. Бұл туралы «Радиоточкаға» Алматы тасымалдаушылар қауымдастығының басшысы, «№1 таксомотор паркінің» жетекшісі Роберт Кан айтты.
Канның айтуынша, билетсіз жүретіндер терминалдарды бос карточкалармен және магниттермен істен шығарады, ал айфондағы Bluetooth арқылы салонның артқы жағындағы екінші терминалды «тұншықтырады». Кейбіреулер ақшасы бар карточкаларын әдейі бүлдіреді, бақылаушы кіргенде ғана төлем жасайды – мұндай сәтте жүйеде транзакциялар күрт көбейеді, – не болмаса ақшаны жүргізушіге карточкасыз береді. Тағы бір айла – картаны көшедегі терминалдан толтырып, ақша әлі түспей тұрғанда жүріп кету.
«Адамдардың шамамен 40 пайызы мүлде төлегісі келмейді», – деді Кан. Оның сөзінше, қаланың төменгі бөлігіндегі кейбір бағыттарда мұндай жолаушылар жартысына жетеді. Тасымалдаушылар уәде етілген табыс өсімін де көрмеді. «Бұрынғыдан тыс уәде етілген 30 пайыз табыс бүгінге дейін ешкімде жоқ», – деді Кан.
Жүйе 11 қаңтарда іске қосылды. 14 қаңтарда, автобус парктері директорларының жиналысынан бірнеше сағат өткен соң, Алматы көлік холдингі шұғыл баспасөз мәслихатын өткізді: тасымалдаушылар жол ақысын жолаушылардың 70 пайызы ғана төлейтінін хабарлады. Холдинг директоры Рифат Абдураманов сол кезде түсім мәселесін екі аптада шешуге уәде берді. «2 аптаның ішінде жүз пайыз төлем болатындай етеміз», – деп жауап берді ол тілшінің сұрағына.
Холдингтің 24 қаңтардағы баспасөз хабарламасына сәйкес, қаңтардың үш аптасында жүйе арқылы 490 249 900 теңгеге 7 780 650 транзакция жасалған. «Радиоточка» Көлік холдингіне сауал жолдап, ресми жауап күтіп отыр.
«Радиоточка» материалдары бойынша.
