Рим Папасы Лев XIV 8 қарашада, жексенбіде, Буэнос-Айреске ұшып келді. Бұл – 1987 жылы елге Иоанн Павел II барғаннан бергі Рим Папасының Аргентинаға алғашқы сапары. Al Jazeera хабарлауынша, Аэропарке әуежайында папаны президент Хавьер Милей мен оның қарындасы, президент әкімшілігінің бас хатшысы Карина Милей қарсы алды.
Ватикан бағдарламасына сәйкес, папаның алғашқы кеші Каса-Росада президент сарайындағы қарсы алу рәсімінен, Милеймен әңгімеден және шенеуніктер, қоғам өкілдері мен дипломаттармен кездесуден тұрды. Дүйсенбіде ол Буэнос-Айресте месса өткізіп, христиан қауымдары мен басқа діндердің жетекшілерімен кездеседі. Сейсенбіде папа Кордоваға ұшады, ал сәрсенбіде федералдық түрмеге барып, Лухандағы базилика алдында месса өткізеді де, бұрын ұзақ жыл епископ болып қызмет еткен Перуге аттанады. Оңтүстік Америкаға сапары 6–17 қараша аралығына жоспарланған, ол Уругвайдан басталды.
Аргентиналықтар үшін бұл сапардың орны ерекше. Америкадан шыққан тұңғыш папа, аргентиналық Франциск 12 жылдық понтификаты кезінде туған еліне бір рет те келмеді, ол 2025 жылы қайтыс болды. Буэнос-Айрестің кедей аудандарында қызмет ететін діни қызметкер Лоренсо де Ведиа Al Jazeera-ға: «Лев Франциск жасай алмаған сапарды жасайды», – деді.
Шіркеу мен қазіргі билік арасындағы қарым-қатынас оңай емес. Католик шіркеуі Милейдің қатаң үнемдеу саясатын – әлеуметтік шығындар мен кедейлерге көмек бағдарламаларының қысқартылуын сынап келеді, кейбір діни қызметкерлер наразылық акцияларына шықты. Милей бұл қысқартулар инфляцияны төмендету үшін қажет деп санайды. Бұған дейін ол Франциск туралы қатаң пікір айтып, оны «коммунист» деп атаған.
Лев XIV 71 жаста, ол – АҚШ-тан шыққан тұңғыш папа. Pew зерттеу орталығының деректеріне қарағанда, Аргентинадағы католиктердің үлесі он жылда 71%-дан 58%-ға дейін азайған. Қазақстанға соңғы рет Рим Папасы Франциск келген: ол 2022 жылғы қыркүйекте Астанадағы Әлемдік және дәстүрлі діндер көшбасшыларының съезіне қатысты.
