«Бавария» капитаны Мануэль Нойердің оң аяқ табанының сіңірі жартылай жыртылды. Бұл диагнозды 8 қарашада, жексенбіде, Мюнхенде өткен тексеру растады, деп хабарлады клуб. 40 жастағы қақпашы бір күн бұрын Бундеслигада «Майнцпен» қонақта өткен ойында жарақат алып, 45-минутта алмастырылды.
«Бавария» емделу мерзімін атамады: мәлімдемеде Нойердің «әзірге» сафтан шыққаны ғана айтылған. Sky Sport Germany деректері бойынша, қақпашы шамамен алты апта ойнай алмайды, сондықтан оның биыл алаңға оралуы екіталай. Abendzeitung журналисі Патрик Штрассер бұдан да ұзақ мерзім — екі-үш ай туралы жазды.
Бұл жарақат жаңа емес. «Бұл аяқта бұрын да болған нәрсе. Енді ол қайта білінді», — деді клубтың спорт директоры Макс Эберль, оның сөзін ZDF телеарнасы келтірді. Сіңірінің тітіркенуіне байланысты Нойер бұған дейін үш матч өткізіп алып, тек Мадридте «Атлетикомен» өткен Чемпиондар лигасы ойынында ғана құрамға оралған еді. Сол ойыннан кейін ол күн сайын жүргенде ауырсыну сезінетінін мойындаған.
Майнцта Нойердің орнына Германия құрамасының қақпашысы, 23 жастағы Йонас Урбиг шықты. «Бавария» бұл ойында 2:1 есебімен жеңді, алғашқы голды Йозуа Киммих соқты. Нойер үшін бұл матч тарихи болды: ол Бундеслига тарихындағы «Баварияның» ең жасы үлкен ойыншысы атанды.
Нойер Мюнхен клубында 2011 жылдан бері ойнап келеді, 2014 жылы Германия құрамасымен әлем чемпионы атанған. Ұлттық құрамадан қақпашы 2024 жылы кетті.
