Алматы қалалық соты бейсенбі күні кешке Сырым Мураткалиев қаза тапқан «Чукотка» барының жанындағы төбелес ісі бойынша Александр Кузнецовты жалпы режимдегі колонияда 8 жылға бас бостандығынан айырды. Сот оны Қылмыстық кодекстің 106-бабының 3-бөлігі бойынша – денсаулыққа қасақана ауыр зиян келтіргені үшін кінәлі деп тапты. Прокурор да дәл осындай мерзім сұраған.
Үкім 29 қаңтарда жариялануы тиіс еді, бірақ Бақытжан Қараманов, Халимат Керимова және Ержан Кененбаев құрамындағы судьялар алқасы 28 қаңтар күні кешке шұғыл отырыс өткізді. Соттың неге асыққаны белгісіз. Іс тараптардың апелляциялық шағымдары бойынша қаралғандықтан, енді үкімге тек кассациялық тәртіппен шағым беруге болады.
Бұған дейін Кузнецов «Абайсызда кісі өлтіру» бабы бойынша бір жарым жылға сотталған еді. Ол үкім жойылып, іс қайта қаралды, ал сотталушы осы уақыт бойы қамауда отырды. Айып денсаулыққа қасақана ауыр зиян келтіру бабына ауыстырылды. Марқұмның ағасы істі «жәбірленушінің абайсызда өліміне әкеп соққан, денсаулыққа қасақана ауыр зиян келтіру» деп саралауды талап еткен.
Төбелес 2015 жылғы 6 наурызда Алматыдағы «Чукотка» барының жанында болған. Оған Кузнецов, Мураткалиев және марқұмның досы Евгений Фролов қатысқан. Іс материалдарына сәйкес, Мураткалиев пышақ суырған, Кузнецов оны жұдырықпен ұрған, Фролов жерге құлатылған. Құжаттарда Кузнецовтың қолындағы кесілген жара тіркелген. Куәлардың айтуынша, төбелестен кейін Кузнецов алғашқы көмек көрсетуге тырысып, жедел жәрдем шақыруды сұраған. Сараптама өлімнің басы асфальтқа соғылуынан болғанын анықтады.
Кузнецовтың өзі қажетті қорғаныс жағдайында әрекет еткенін айтып келді. Мәйітті эксгумациялағаннан кейін жүргізілген екінші сараптама сотқа дейінгі сараптамадан айырмашылық тапқан жоқ. Тек бас сүйек пен іс материалдары бойынша Талдықорғаннан келген мамандар жүргізген үшінші сараптама соққы мен құлаудан болған жарақаттарды денсаулыққа келтірілген ауыр зиян деп таныды. Сарапшылар соққы жұдырықпен емес, саптыаяқпен немесе стақанмен жасалған болуы мүмкін деп болжады.
Марқұмның туыстары 18 млн теңге мен Алматыдан үш пәтер талап еткен, бірақ үкім жарияланғанға дейін бұл талаптарынан бас тартты.
«Радиоточка» материалдары бойынша.
