Құрамына City супермаркеттері мен Thomi’s Pastry кондитерлік дүкендері кіретін Interfood сауда желісі ресми мәлімет бойынша Шолпан Құлмахановаға тиесілі. Ол желіге «Қазақстан-герман бірлескен кәсіпорны» ЖШС арқылы иелік етеді. Жұбайы — Алматы қаласы мен Алматы облысының бұрынғы әкімі, төтенше жағдайлар жөніндегі экс-министр Шалбай Құлмаханов.
Interfood — Астанада, Алматыда және Алматы облысында гипер- және супермаркеттері, өз аспаздық-кондитерлік өндірісі бар сауда-өндіріс компаниясы. Топқа City, Ideal Home, Thomi’s Pastry және басқа да брендтер кіреді. Тауардың шамамен 70 пайызы Еуропадан әкелінеді, компанияда мыңға жуық адам жұмыс істейді. Фирма 1999 жылғы қыркүйекте құрылып, 2011 жылы қайта тіркелген. Бас директоры — Шолпан Құлмаханова.
Құжаттарға сәйкес, оның атында сондай-ақ нан, торт және пирожный шығаратын «Eurobakery and Thomis pastry» ЖШС, «Medicus-Centre» фармдистрибьюторы, «City group invest», «Free line Group» және «Ақшағала» тасымал компаниясы бар. Interfood арқылы ол «Вернеские колбасы» (серіктесі — Молдакез Ахмолданов) және Thomi’s Pastry (тең құрылтайшысы — Дархан Балабаев) компанияларын бақылайды.
1995 жылдан бері жұмыс істеп келе жатқан «Medicus-Centre» дәрі-дәрмек, медициналық бұйым және парафармацевтика жеткізеді. Компанияның он филиалы, алты өкілдігі және жалпы ауданы 15 мың шаршы метрден асатын он бір қоймасы бар, бас кеңсесі Алматыда орналасқан. Клиенттері — 3000-нан астам, сауда нүктелері — 4500-ден астам, сатылымның шамамен 60 пайызы дәріхана желілеріне тиесілі. Еншілес компаниясы — «Medicus Dent» стоматологиясы.
Шолпан Құлмаханова жұбайымен бірге елге азық-түлік пен тұрмыстық химия таратумен айналысатын Free Line Distribution компаниясына иелік етеді. Компания 2014 жылдың жазынан бері Aroma және «777» кофе брендтері мен Boso снектерінің иесі — литвалық UAB «Daisena» компаниясының Қазақстандағы ресми серіктесі. Еншілес «Free Line Service» 2011 жылғы маусымнан бастап Алматы облысы Іле ауданының Первомайский кенттік округінде ауданы 28 мың шаршы метрден асатын «А» класты логистикалық орталық салып жатыр. Жоба «Бизнестің жол картасы-2020» бағдарламасына қатысады: оған «Даму» қоры мен Халық банкінен 3,5 млрд теңге несие бөлініп, мөлшерлеменің 7 пайызы субсидияланған.
Шалбай Құлмахановқа биыл 69 жас толады. Ол Балқаш ауданындағы Қойған ауылында туған, еңбек жолын балташы болып бастаған, Алматыдағы құрылыс тресттерінде істеген. Кейін Әуезов аудандық атқару комитетінің төрағасынан Солтүстік Қазақстан облыстық атқару комитетінің төрағасы және Ақтөбе әкімшілігінің басшысы лауазымына дейін көтерілген. 1994 жылғы маусымнан 1997 жылғы маусымға дейін Алматы әкімі болған, 2001–2005 жылдары Алматы облысын басқарған. Соңғы лауазымы — төтенше жағдайлар министрі (2005–2007).
Материалдағы мәліметке қарағанда, ол Дархан Балабаев пен Батирбек Темиргалиевпен бірге Текелідегі «Mountain mineral» және «Мрамор Тас» компанияларына, Сарсембер Аманжоловпен бірге «Мекен» және «Мекен-сервис» ЖШС-ларына, Жолдасбай Аманжоловпен бірге «Қойған» көлік-экспедиторлық ЖШС-ына қатысады. Алматыдағы Абылай хан даңғылында орналасқан White Tower International бизнес-орталығы да соған тиесілі. «Мекен-сервис» арқылы ол «Азия групп» компаниясын және тең құрылтайшылары — «Иран Ходро Ашгабат» пен Мохаммад Азизи Али болып табылатын «Персия моторс» автосалонын бақылайды. «Азия групп» құрамында «Ақтоған» аңшылық шаруашылығы, ешкі өсіретін «Ақтасты», құрылыс және сервис компаниялары, сондай-ақ «Атил-Азия» бар.
Құжаттарда «Азия групп» серіктесі ретінде Шолпан Құлмаханованың сіңлісі Райхан Уваисова көрсетілген. Оған «Қараой» мал шаруашылығы кешені жалғыз өзі тиесілі. Бұл кешен — «Қазақстанның шошқа шаруашылықтары одағының» құрылтайшыларының бірі. Тағы бір сіңлісі, бұрынғы мұғалім Зубайра Уваисова қонақүй бизнесімен айналысады: Алматыдан 70 шақырым жердегі Қапшағай су қоймасының солтүстік жағалауындағы Royal Village Resort & SPA кешені соған тиесілі. 2011 жылы кешеннің іске қосылуы күмәнді болған, бірақ «Даму» субсидиясы көмектесті: банк мөлшерлемені 16 пайыздан 12 пайызға төмендетіп, несие мерзімін 2021 жылға дейін ұзартты.
Ерлі-зайыптылардың қызы Ләззат «Prestige Service Center» компаниясына иелік етеді және «Ғасыр» ғылыми-талдау орталығының мүшесі.
«Радиоточка» материалдары бойынша.
