2015 жылы бес күндік жұмыс аптасымен қазақстандықтар 120 күн демалады. Бұған заң бойынша берілетін 24 күнтізбелік күн ақылы еңбек демалысы қосылады.
Жыл қаңтардағы 12 демалыс күнімен басталды: бес сенбі, төрт жексенбі, 1–2 қаңтардағы Жаңа жыл және 7 қаңтардағы православиелік Рождество.
Демалысы ең көп айлар — наурыз бен мамыр: әрқайсысында 13 демалыс және мереке күні бар. 8 наурыз — Халықаралық әйелдер күні жексенбіге сәйкес келетіндіктен, 9 наурыз, дүйсенбі демалыс болады. Наурыз мейрамы 21–23 наурызда, сенбіден дүйсенбіге дейін тойланады. Мерекенің екі күні демалысқа тұспа-тұс келгендіктен, олар 24 және 25 наурызға ауыстырылды. Сөйтіп, қазақстандықтар қатарынан бес күн демалады.
Мамырда мерекелер бірінен соң бірі келеді: 1 мамыр, жұма — Қазақстан халқының бірлігі мерекесі, 7 мамыр, бейсенбі — Отан қорғаушы күні. 9 мамыр — Жеңіс күні сенбіге сәйкес келгендіктен, демалыс 11 мамыр, дүйсенбіге ауыстырылды.
Жазда және күзде 6 шілде, дүйсенбі — Астана күні демалыс болады. 30 тамыз — Конституция күні жексенбіге тура келгендіктен, 31 тамыз да демалыс күні болады. 24 қыркүйек, бейсенбі — Құрбан айттың бірінші күні.
Желтоқсанның 1-і, сейсенбі — Тұңғыш Президент күні, демалыс күндерімен қосқанда үш күн демалыс шығады. Тәуелсіздік күні 16–17 желтоқсанда, сәрсенбі мен бейсенбіде аталып өтеді.
Ақпан, сәуір, маусым, қазан және қараша айларында мереке күндері жоқ. Бұл айларда бес күндік аптамен 42, ал алты күндік аптамен 21 демалыс күні болады.
Салыстыру үшін, Hotels.com порталының мәліметінше, 2013 жылы жұмыс істемейтін күндер саны бойынша Ресей бірінші орында болған. Сол жылы ресейліктер қаңтарда 10, мамырда 9 күн демалған. Алдын ала бағалау бойынша, бұл мерекелерде федералдық бюджеттің шығыны 200 млрд рубль, ЖІӨ шығыны 1 трлн рубль болуы тиіс еді. Ресей Еңбек министрлігінің есебінше, бір мереке күні ЖІӨ-ні 12–14 млрд рубльге азайтады. 2015 жылы Ресейде жаңажылдық демалыс он бір күнге созылды. Қазақстанда мұндай есеп жүргізілмейді.
«Радиоточка» материалдары бойынша.
