Астана мен Алматыдағы премиум-класты Galmart супермаркеттер желісін ресми түрде «Жеті Аспан» ЖШС басқарады, оның жалғыз құрылтайшысы ретінде 1960 жылы туған Галина Зкрияева көрсетілген. Бұл деректерді «Радиоточка» ресми және ашық дереккөздерден жинады. БАҚ мәліметінше, брендтің идеясын ұсынып, оны құрған да – Зкрияева.
Алғашқы Galmart дүкені 2011 жылғы 16 желтоқсанда Астанадағы «Керуен» сауда-ойын-сауық орталығында ашылып, оның негізгі жалға алушыларының біріне айналды. 2014 жылы желі Алматыға келді: дүкен Достық даңғылы мен Жолдасбеков көшесінің қиылысындағы «Dostyk Plaza» сауда орталығында ашылды.
Ашық деректерге қарағанда, Галина Зкрияеваның атында тағы екі компания тіркелген. «Жеті Аспан – Сервис» ЖШС сұлулық және денсаулық саласында жұмыс істеп, премиум-класты салондар ұстайды. 2008 жылы тіркелген «Седьмое небо-Алматы» туристік компаниясы luxury-туризммен айналысады. Компания өз сайтында өзін тәулік бойы консьерж-қызмет көрсететін люкс класты жетекші агенттік деп атап, аудиторы PricewaterhouseCoopers болып табылатын Luxury Lifestyle Awards сыйлығын бірнеше рет алғанын хабарлайды.
Бұдан бөлек, Зкрияеваның «GS Company» ЖШС жарғылық капиталында үлесі бар, оның тең құрылтайшысы ретінде Юлия Босенко, басшысы ретінде Семён Босенко көрсетілген. «Радиоточка» материалында осы қатарда «Квадроцентр» ЖШС да аталады. Ол Астананың мототехника нарығында жұмыс істейді: мотоцикл, скутер, мопед, квадроцикл, қар мотоциклі, велосипед және қосалқы бөлшектер сатады, сервис көрсетеді және HAWK Moto атты жеке мотокиім желісін шығарады. Компания өзін Diesel GS-тің Қазақстандағы жалғыз өкілі, Racer-дің ресми дилері, Irbis пен «Урал»-дың эксклюзивті дилері ретінде таныстырады.
Сондай-ақ ашық дереккөздерге сәйкес, Зкрияева «Керуен» сауда орталығының бас директоры қызметін атқарады және 2009 жылдан бері жұмыс істеп келе жатқан «Compass Astana Company» ЖШС-ны басқарады. Бұл компания жылжымайтын мүлікті жалға беру және пайдаланумен айналысатын «Astana Luxe Retail» және «Astana Real Property Development» ЖШС-ларының құрылтайшысы. Осы екі компанияның меншік иелері қатарында «Аяла» жеке қайырымдылық қорының негізін қалаған Айдан Сүлейменова мен «Кипрос» ЖШС көрсетілген. «Кипростың» жалғыз құрылтайшысы ретінде ҚР Ұлттық кәсіпкерлер палатасы төралқасының төрағасы Тимур Құлыбаев аталады.
«Радиоточка» бұған дейін «Керуен» сауда орталығының иелері мен Құлыбаевтар отбасының активтері туралы жазған.
«Радиоточка» материалдары бойынша.
