Астана қаласының Төтенше жағдайлар департаменті дауыл туралы ескерту таратты: 13 наурызда таңертең және күндіз елордада жауын-шашын, көктайғақ болып, оңтүстік-батыс желдің екпіні секундына 15–20 метрге дейін күшейеді. Бұл туралы «Қазгидромет» РМК деректеріне сілтеме жасап, 24.kz порталы хабарлады.
Синоптиктердің түсіндіруінше, Қазақстанда құрғақ ауа райын ұстап тұрған антициклон ыдырап, Сібірдің оңтүстігіне қарай ығысып барады. Оның орнына Ресейдің еуропалық бөлігінен атмосфералық фронттары бар циклон келе жатыр.
«Қазгидрометтің» 12–14 наурызға арналған болжамы бойынша, алдымен жылы, кейін суық фронт өткенде республиканың басым бөлігінде жауын-шашын, тұман және көктайғақ күтіледі. Елдің солтүстігінде боран соғып, жел екпіні секундына 15–20 метрге жетуі мүмкін. Оңтүстікте негізінен жаңбыр жауып, таулы аудандарда қар аралас жаңбыр болады.
Ауа температурасы төмендейді, алайда жылдың осы мезгіліндегі климаттық нормадан жоғары болып қалады.
«Радиоточка» материалдары бойынша.
