Астанада әкімдік «Нұра» ауданындағы 22 саяжай учаскесінің жерін иелерінен мәжбүрлеп сатып алады. Учаскелер Айтматов көшесі мен жобалық атауы Е167 көшенің қиылысындағы «Дружба-2» және «Учитель» бағбандық серіктестіктерінде орналасқан. Оларды 2027 жылғы 1 ақпаннан 2028 жылғы 1 ақпанға дейін сатып алады. Әкімдік бұл қаулыны 6 қарашада қабылдады, мәтінін «Вечерняя Астана» газеті жариялады.
Қала барлығы 1,7 гектарға жуық жерді алады. Жер Астана қаласының Құрылыс басқармасына беріледі. Басқарма онда іздестіру жұмыстарын жүргізіп, қаулыда жай ғана «Әкімшілік ғимарат» деп аталған нысанның жобасын әзірлейді. Ғимаратта нақты не орналасатыны құжатта айтылмаған. Әкімдік жерді сатып алуға үкімет 2024 жылғы қаңтарда бекіткен елорданың бас жоспарын негіз етіп отыр.
Тізімде «Дружба-2» серіктестігінен 18, «Учитель» серіктестігінен төрт позиция бар. Олардың тоғызы толық алынады. Солардың қатарында «Дружба-2»-дегі № 40, 42, 44, 45, 45А, 46 және 170 учаскелер бар. Қалғандарының тек бір бөлігі ғана алынады: біреуінен небәрі 2 шаршы метр, енді біреуінен 7 сотықтан астам жер кетеді. Бұл жердің басым бөлігі бағбандыққа арналған. Тек № 41 құрылыстың жері бөлек: 4 сотық бұл учаске коммерциялық үй-жайлары мен паркингі бар тұрғын үй салуға бөлінген.
Қаулы жарияланғаннан кейін үш күн ішінде иелеріне жазбаша хабарлама жіберіледі. Хатты алған күннен бастап меншік иесінің әкімдікке жүгінуіне және келісу рәсімдерін бастауына, яғни өтемақы мен сатып алу шарттары жөнінде келісуіне 15 күнтізбелік күн беріледі. Өтемақы сомасы қаулыда көрсетілмеген. Жердің ақысын төлеу және сатып алу жұмысы Астана қаласының Тұрғын үй және тұрғын үй инспекциясы басқармасына жүктелді. Бақылау әкімнің бірінші орынбасары Нұрлан Нұркеновке тапсырылды.
Елордада жерді мемлекет мұқтажы үшін мәжбүрлеп сатып алу бұрын да болған. Жазда әкімдік Есіл ауданында, Қонаев пен Сарайшық көшелерінің арасында қонақүй салу үшін 26 учаскені алатынын хабарлаған еді.
