АҚШ Қаржы министрі Скотт Бессент Вашингтондағы үйінен кетіп, әскери базаға қоныстанды. Себебі – Иран тарапынан оның өміріне төнген қатер. Бұл туралы алғаш рет 10 қарашада, сейсенбі күні, The New York Times, одан кейін Reuters хабарлады. Екі басылым да хабардар дереккөздерге сілтеме жасайды. Қай база екені және министрдің онда қанша уақыт тұратыны нақтыланбаған.
NYT мәліметінше, Бессентке төнген қатер туралы барлау деректері американдық билікті Иранның АҚШ-тың қазіргі және бұрынғы шенеуніктеріне қарсы қастандық жоспарлары әлдеқайда ілгері сатыға жеткен деген қорытындыға келуге итермелеген. Қатердің қаншалықты күшті екені белгісіз. Al Jazeera дереккөзінің айтуынша, The Wall Street Journal министрдің Джорджтаун ауданындағы құны 12,5 млн долларлық сарайының әуеден түсірілген суретін жариялағаннан кейін Иран оның орнын анықтап алуы мүмкін.
Қаржы министрлігі көшу фактісін растамады. Ведомство өкілі: «Иран режимінің қоқан-лоққысы Бессентті тоқтата алмайды», – деп мәлімдеді. Министр тамыз айынан бері Тегеранға экономикалық қысым көрсету науқанын – Economic Outcast операциясын басқарып келеді. Оның мақсаты – Иранды кемелерге шабуылды тоқтатуға және Ормуз бұғазын ашуға мәжбүрлеу. Министрлік өкілінің сөзінше, Иран порттарын теңізден қоршаумен қатар бұл науқан «Иран экономикасын құлдыратып жатыр».
Ескертулер басқа деңгейлерде де айтылып жатыр. CBS News хабарлауынша, Ұлттық барлау директоры Джей Клейтон Мемлекеттік хатшы Марко Рубиоға жолдаған құпия емес жазбасында Иран американдықтарға шабуыл жасау әрекеттерін «едәуір күшейткенін» жазған. Ирандық қатер туралы хабарлардан кейін Ұлыбританиядағы екі базадан американдық ұшақтар әкетілді, ал АҚШ-та Англиядағы Фэрфорд әуе базасына шабуыл дайындау ісі бойынша Иранмен байланысты үш адамға айып тағылды. Тегеран бұған дейін шенеуніктерге және АҚШ аумағындағы адамдарға шабуыл дайындап жатқанын жоққа шығарған.
Бессент – Трамп командасында әскерилердің күзетімен тұратын алғашқы мүше емес. Рубио мен қорғаныс министрі Пит Хегсет Вашингтондағы Форт-Макнэр базасында тұрады, олардың көшкені өткен жылы белгілі болған. Бұрын ішкі қауіпсіздік министрі болған Кристи Ноэм пәтерінің мекенжайы жария болғаннан кейін Анакостия-Боллинг базасына көшкен.
АҚШ пен Израильдің Иранмен соғысы ақпанның соңынан бері жүріп жатыр, алғашқы апталарда соққылардан Иранның жоғары басшылары, соның ішінде жоғарғы көшбасшы аятолла Әли Хаменеи қаза тапты. Қазір Вашингтонда ауқымды ұрыс операцияларының енді қажеті жоқ деп отыр, бірақ Ормуз бұғазында танкерлерге шабуыл толастар емес.
