Алматы полициясы «Адем» сауда орталығындағы өрт дерегі бойынша сотқа дейінгі тергеу бастады. Қалалық ішкі істер департаментінің баспасөз қызметі хабарлағандай, тексеру Қылмыстық кодекстің екі бабы — «Өрт қауіпсіздігі талаптарын бұзу» және «Бөтен мүлікті абайсызда жою немесе бүлдіру» бойынша жүргізіледі. Дерек сотқа дейінгі тергеулердің бірыңғай тізілімінде тіркеліп, ІІД тергеу басқармасы бірқатар сараптама тағайындады. Өрттің себебі мен шығын көлемі анықталып жатты.
Өрт туралы хабар ТЖД пультіне 2015 жылғы 26 сәуірде сағат 22:24-те сауда орталығы күзетінің диспетчерінен түсті. Алдын ала деректерге қарағанда, жалын шамамен 25 мың шаршы метр аумақты қамтыды. Ғимарат ішіндегі температура 270 градусқа жетіп, қою түтінде улы заттар болды, бұл өрт сөндірушілердің жұмысын қиындатты. Сонымен қатар автоматты өрт дабылы мен өрт сөндіру жүйесі ақаулы болып шықты, ал сыртқы өртке қарсы сумен жабдықтау желілерінде су болмады. Өрт сағат 06:35-те ауыздықталды, қаза тапқандар мен зардап шеккендер жоқ.
Tengrinews.kz еске салғандай, 2012 жылғы шілдеде құтқарушылар «Адемнен» өрт қауіпсіздігі талаптарының 11 бұзушылығын анықтаған. Сауда орталығына 45 мың теңгеге жуық айыппұл салынып, ТЖД талабы бойынша сот оның жұмысын тоқтата тұрған. 2013 жылғы бақылау тексерісі бұзушылықтардың жойылғанын көрсетті. 2014 жылы шағын және орта бизнесті тексеруге мораторий болғандықтан, тексеріс жүргізілмеген, ал келесі тексеру 2015 жылдың екінші жартысына жоспарланған еді.
Tengrinews.kz материалдары бойынша.
