Иран 21 қарашада жергілікті уақытпен кеш (Астана уақытымен 22 қарашаға қараған түні) АҚШ Әскери-теңіз күштерінің Бесінші флотының штабы орналасқан Бахрейнге шабуыл жасады. Al Jazeera хабарлауынша, Бахрейн Ішкі істер министрлігі соққы азаматтық өнеркәсіп нысанына тиіп, өрт шығарғанын мәлімдеді. Алдын ала деректер бойынша, материалдық шығын бар, зардап шеккендер жоқ. Министрлік нысанның қандай екенін және қай жерде орналасқанын нақтыламады. Бахрейн қорғаныс күштері әуе шабуылынан қорғаныс жүйелері Иранның бірнеше әуе шабуылын тойтарғанын хабарлады.
Иранның элиталық қарулы күштері — Ислам революциясы сақшылары корпусы (ИРСК) Эр-Рифа және Авали базаларындағы америкалық әскерилердің позицияларына зымырандар мен дрондармен соққы беріп, Patriot әуе шабуылынан қорғаныс жүйесінің екі радарын жойғанын мәлімдеді. ИРСК шабуылды Иран үстінде америкалық MQ-1 және MQ-9 ұшқышсыз ұшу аппараттарының ұшуына жауап деп атады. Радарлардың жойылғаны тәуелсіз дереккөздерден расталған жоқ.
Бахрейн СІМ БҰҰ Қауіпсіздік кеңесін Иранды 2817 қарарды орындауға мәжбүрлеу үшін «қатаң шаралар» қабылдауға шақырды. Бұл қарар 11 наурызда қабылданған: құжат Иранның Парсы шығанағы елдері мен Иорданияға соққыларын айыптап, ұрыс қимылдарын дереу тоқтатуды талап етеді. Парсы шығанағы арабы мемлекеттерінің ынтымақтастық кеңесі Бахрейнге «толық ынтымақтастығын» білдірді.
Шабуыл жаңа дипломатиялық байланыстармен тұспа-тұс келді. Al Jazeera мәліметінше, Иран сыртқы істер министрінің орынбасары Казем Гарибабади 20 қарашада кешке Тегеранға Катар делегациясы келіп, ирандық шенеуніктермен екі сағат келіссөз жүргізгенін айтты. Оның сөзінше, бұл байланыстар әзірге ресми келіссөзге айналған жоқ, ал Тегеран америкалық экономикалық блокаданы соғыс актісі деп санайды. Иран СІМ басшысы Аббас Аракчи АҚШ «халықаралық құқыққа сәйкес келетін ақылға қонымды шарттарды» қабылдаса, Ормуз бұғазын ашу «қиын емес» екенін мәлімдеді. Тегеран шарттарының қатарында — барлық майдандағы соғысты тоқтату, активтерді бұғаттан шығару және мұнай санкцияларын алып тастау.
АҚШ президенті Дональд Трамп 21 қарашада Fox News арнасына берген сұхбатында Иранның ядролық қару алуына жол бермейтін «тұрақты» келісім жасағысы келетінін айтты. «Біз келісім жасаймыз, ал келесі күні олар оны бұзады», — деді ол. Бұған дейін Трамп Иранға жаңа соққылар туралы шешімді келесі жылға қалдырған еді.
Соғыс 28 ақпанда АҚШ пен Израиль Иранға шабуыл жасағаннан кейін басталды. Тегеран бұған жауап ретінде Израильге және америкалық базалар орналасқан Шығанақ елдеріне соққы беріп келеді. Бұл шабуылға дейін Иран бірнеше апталық тыныштықтан кейін санаулы күн ішінде Бахрейнге үш рет дронмен шабуыл жасаған.



