8 қарашада Ақмола облысында, Астана – Атбасар – Жақсы тас жолының 329-шақырымында Toyota Camry көлігі аударылып кетті. Жолаушы әйел оқиға орнында қаза тапты. Тағы бес жолаушы — бір әйел мен төрт бала ауруханаға жеткізілді, балалардың үшеуінің жағдайы ауыр.
Ақмола облысының полиция департаменті мәліметінше, жүргізуші рульді басқара алмай, көлік жол жиегіне шығып, аударылып қалған. Жүргізуші ұсталып, уақытша ұстау изоляторына қамалды. Полиция сотқа дейінгі тергеп-тексеру жүргізіп жатыр, оның қорытындысы бойынша іс жүргізу шешімі қабылданады. Жол апатының қай уақытта болғанын және қаза тапқан әйелдің жасын ведомство нақтыламады.
Зардап шеккендер алдымен Жақсы аудандық ауруханасына жеткізілді. Облыстық денсаулық сақтау басқармасының хабарлауынша, кейін үш бала — 13 және 6 жастағы ұлдар мен 11 жастағы қыз санавиациямен Көкшетаудағы көпбейінді облыстық балалар ауруханасына ауыстырылды. Олардың жағдайы ауыр, 13 жастағы бала жансақтау бөлімінде жатыр. 1 жас 8 айлық қыз бала мен 35 жастағы әйел Жақсы аудандық ауруханасында қалды. Олар толық тексеруден өтті, жағдайы тұрақты, нашарлау байқалмайды.
Демалыс күндері облыс тас жолдарында болған ауыр жол апаты бұл ғана емес. 7 қарашада Көкшетау маңында, Астана – Петропавл тас жолының 312-шақырымында Volvo жүк көлігі, Hyundai Genesis және Lada Granta соқтығысты. Hyundai жүргізушісі мен төрт жолаушысы ауруханаға жеткізілді, ал жергілікті БАҚ мәліметінше, зардап шеккендердің арасында төрт күндік нәресте болған.
Қазгидромет 10 қарашаға барлық 17 облыста дауылды ескерту жариялады, Ақмола облысы мен Көкшетауда көктайғақ күтіледі. Тас жолдың нақты учаскесіндегі жағдайды тәулік бойы 1403 нөмірі арқылы білуге болады — бұл «ҚазАвтоЖол» колл-орталығы.
