Суреті Қазнетте кең тараған «Назарбаевтың курстасы» деген жазуы бар визитканың иесі «Радиоточкаға» оның шын екенін растады. Редакция визиткадағы нөмірлердің біріне хабарласқанда, телефонды Заман Имамдуновтың өзі алды. Оның айтуынша, визиткадағы барлық телефон нөмірі жұмыс істеп тұр.
Иесінің аты-жөні мен телефондарынан бөлек, оның Президент Нұрсұлтан Назарбаевпен бірге оқығаны жазылған визитканың суреті әлеуметтік желіде күлкі, кекесін, наразылық пен қызғаныш туғызды. Имамдуновтың өзі жарияланған суретте жазудың бір бөлігі кесіліп қалғанына наразы. Оның айтуынша, визиткада «Нұрсұлтан Әбішұлының Днепродзержинск қаласы бойынша курстасы» деп жазылған, бірақ қаланың атауы алынып тасталған. «Өшіріп тастағаны — көргенсіздік», — деді ол.
Имамдунов Назарбаевпен бірге Украинаның Днепродзержинск қаласында екі жыл оқығанын айтты. Кейін Теміртаудағы жұмыс орындары әлі дайын болмағандықтан, топты бір жылға Луганск облысындағы Алчевскіге тәжірибеден өтуге жіберген. Оның сөзінше, Назарбаев Теміртауда қалған, ал өзі «Магниткада» мартен пешінің іске қосылуын күткен.
«Онымен бірге оқығанымды, бірге жұмыс істегенімді мақтан тұтамын», — деді Имамдунов. Оның айтуынша, визитканы әдейі жасатқан және ол көмектеседі: министрліктерде таңғалып, мүмкіндігінше қабылдайды. Ол алыпсатарлықпен айналыспайтынын, қолынан келгенше Президенттің жұмысына көмектесетінін атап өтті. Жарияланымнан кейін хабарласқандарға өзінің алаяқ емес екенін айтады, ал нөмірлерін ауыстырмақ емес: қоңыраудан қорқатын ештеңесі жоқ.
Имамдунов 75 жаста, зейнеткер. Оның айтуынша, топта 62 адам болған, қазір 14-і қалған. Олар Президентпен өздерінің 40 жылдығында, Қазақстан Магниткасының 50 жылдығында, Теміртаудағы Тұңғыш Президент мұражайының ашылуында және Астанада «Көшбасшы жолы» фильмінің тұсаукесерінде кездескен. Ол курстастарымен бірге Президентке көмектесу үшін «Нұрсұлтан Әбішұлының курстастары фирмасын» құрған. Имамдуновтың сөзінше, фирма қытайлық серіктестермен бірге сұранысы жоғары теміржол бөлшектерін шығарады және Жамбылда өндіріс ашпақ.
«Радиоточка» материалдары бойынша.
