Алматының Түрксіб аудандық соты бұрынғы судья Күлпаш Өтемісованың өтінішін ішінара қанағаттандырып, оған жазаның қалған мерзімін бас бостандығын шектеумен ауыстырды. Егер прокуратура 15 күн ішінде шешімге Алматы қалалық сотына наразылық білдірмесе, Өтемісова тергеу изоляторынан босатылады.
Өтінішті судья Аида Қарғашова қарады. Өтемісова Қылмыстық кодекстің 73-бабына сүйеніп, жазаның қалған бөлігін айыппұлмен не бас бостандығын шектеумен ауыстыруды, сондай-ақ мемлекеттік қызметте лауазым атқаруға салынған тыйымды алып тастауды сұраған. Сот бас бостандығынан айырудың қалған 2 жыл 9 ай 22 күнін сол мерзімге бас бостандығын шектеумен ауыстырды. Ал мемлекеттік қызметке салынған үш жылдық тыйымды алып тастаудан бас тартты.
Бостандыққа шыққан соң Өтемісова үйінде болуға, тұрғылықты жерін ауыстыру мен қаладан шығуды тек арнаулы органның рұқсатымен жүзеге асыруға және үнемі тіркеуден өтіп тұруға міндетті.
Прокурорлар Айман Уәлиева мен Ерлан Сержанов жазаны жеңілдетуге қарсы шықты. Сержановтың айтуынша, өтелген мерзім түзелу үшін жеткіліксіз. Өтемісова оған қарсылық білдірді, бірақ сот оны қабылдамады. Өтінішті түзеу мекемесінің тәрбиешісі мен адвокат Владимир Попов қолдады.
«Формалды тұрғыдан сот дұрыс», – деді Попов отырыстан кейін. Оның пікірінше, айыппұл бюджет үшін тиімдірек болар еді, ал ізгілік мәселесі даулы күйінде қалып отыр.
Өтемісова «Құқыққа қайшы шешім шығару» бабы бойынша сотталған. Оның ісі кәсіпкер Александр Сутягинскийдің апелляциясы бойынша шығарылған шешімге байланысты. Бірінші сатыдағы сот Сутягинскийді серіктесі Михаил Гаркушкинді өлтіруге тапсырыс берді деген айыппен 12 жылға бас бостандығынан айырған, Гаркушкиннің өлімі жалған болып шыққан. Өтемісова апелляцияда оның әрекетін басқа бапқа ауыстырып, 6 жыл шартты жаза тағайындаған және оны сот залынан босатқан.
«Радиоточка», Адам құқықтары және заңдылықты сақтау жөніндегі Қазақстан халықаралық бюросы материалдары бойынша.
