Бүгін, 7 қарашада, Қазақстанда Әскери журналистер күні атап өтіледі. Бұл — армия туралы айтып жүрген Қорғаныс министрлігі тілшілерінің, редакторларының, фотографтары мен операторларының мерекесі.
Мереке күні республикалық «Қызыл әскер» әскери газетінің алғашқы нөмірінің құрметіне таңдалған. Ол 1929 жылы 7 қарашада шықты. Газет аптасына бір рет латын әліпбиімен басылып тұрған, оның авторларының қатарында ақын Ілияс Жансүгіровтің есімі аталады. Соңғы нөмірі 1936 жылдың қазан айында жарық көрді. Тәуелсіз Қазақстанның өз Қорғаныс министрлігі құрылғаннан кейін таратылған Орта Азия әскери округінің «Боевое знамя» газеті негізінде «Қазақстан сарбазы — Воин Казахстана» басылымы шыға бастады. Оның алғашқы нөмірі 1992 жылы 16 желтоқсанда қазақ және орыс тілдерінде жарық көрді. Бүгінде ведомство «Сарбаз» газеті мен «Айбын» журналын шығарады.
Бұл күні «Сарбаз» бен «Айбын» журналистерін, Қорғаныс министрлігінің Ақпарат және коммуникациялар департаментінің, әскер түрлері, гарнизондар мен әскери оқу орындары баспасөз қызметтерінің қызметкерлерін құттықтайды. Армия өмірін түсіретін фотографтар, операторлар, мобилографтар мен дизайнерлер де мерекелейді. Әскери медиа мамандары тек ведомстволық басылымдарға ғана жұмыс істемейді: баспасөз қызметтері министрліктің сайтын және Telegram, Instagram, YouTube, TikTok желілеріндегі парақшаларын жүргізеді. Әскери журналистердің өз сыйлығы да бар — «Әскер медиа». Ол алғаш рет 2017 жылдың қарашасында табысталды, бұл марапатты армия туралы жазатын азаматтық журналистер де алады.
Биыл «Қызыл әскер» газетінің алғашқы нөмірі шыққанына 97 жыл толады.
