Екінші орта салмақтағы қазақстандық боксшы Бек Нұрмағанбет мексикалық Маркос Родригесті бірінші раундта нокаутқа түсірді. Жекпе-жек 31 қазанда Эр-Риядта өтті. Кештің басты оқиғасы — мексикалық Сауль «Канело» Альварес пен француз Кристиан Мбиллидің WBC нұсқасы бойынша әлем чемпионы атағы үшін жекпе-жегі. Осы жеңістің арқасында қазақстандық боксшы жеңілмеген рекордын сақтап қалды: ол 17 жекпе-жектің бәрінде жеңіп, оның 15-ін нокаутпен аяқтады.
Жекпе-жек он раундқа жоспарланған еді, бірақ алғашқы үш минуттың өзінде мерзімінен бұрын аяқталды. Нұрмағанбет алдымен қарсыласын нокдаунға жіберді, сосын оны нокаутқа түсірді. Рингке 21 жеңіс, 3 жеңіліс және 1 тең нәтижемен (10 КО) шыққан Родригес үшін бұл — мансабындағы төртінші жеңіліс.
Нұрмағанбет 28 жаста, Шымкентте туған, екінші орта салмақта — 76,2 келіге дейін өнер көрсетеді. Қазақстандық боксшы Канелоның командасында жүр, оның спарринг-серіктестерінің бірі.
Нұрмағанбет алдыңғы жекпе-жегін жазда Алматыда өткізіп, ресейлік Артыш Лопсанды бесінші раундта нокаутқа түсірген. Алайда одан кейін BoxRec рейтингінде 11-орыннан 13-орынға түсіп кетті. Эр-Риядтағы кештің басты жекпе-жегінде Канело рингке үміткер ретінде шықты: WBC белбеуі Мбиллиге тиесілі.
