Ресей әскері 31 қазан күні кешке Киевке шабуылдаушы дрондармен шабуыл жасады. Елорданың солтүстігіндегі Оболонь ауданында дрон сынықтары сауда орталығының аумағына құлап, 12 жасар қыз бала жараланды. Дәрігерлер оған оқиға орнында көмек көрсетті. Бұл туралы Киев қалалық әскери әкімшілігі хабарлады. Әкімшілік алғашында әйел адам зардап шекті деп хабарлап, кейін оның бала екенін нақтылады.
Елордаға шабуыл одан кейін де жалғасты. Киев уақытымен сағат 21:16 шамасында (Астана уақытымен 00:16) қала билігі Дарница ауданында жеке үй ауласының ашық жеріне дрон құлағанын хабарлады. Алдын ала мәлімет бойынша, қаза тапқан не жараланған адам жоқ. Киев уақытымен 21:52 шамасында (Астана уақытымен 00:52) қаланың солтүстік-шығысындағы Десна ауданында дрон құлады: тұрғын емес аумақта өрт шығып, тұрақтағы көліктер жанды. Украинаның Төтенше жағдайлар мемлекеттік қызметінің құтқарушылары базар маңындағы тұрақтағы өртті сөндірді.
Ресей 31 қазанда күні бойы Украинаға дрондармен шабуыл жасады. Украина Әуе күштерінің мәліметінше, Киев уақытымен 06:30-дан 19:30-ға дейін (Астана уақытымен 09:30-дан 22:30-ға дейін) Ресей әскері 168 шабуылдаушы дрон ұшырды, олардың 51-і – реактивті дрон. Сонымен қатар екі S8000 «Бандероль» қолданылды. Әуе қорғанысы 122 дронды, соның ішінде 37 реактивті дронды және екі S8000-ды атып түсірді немесе басып тастады. Әуе күштерінің хабарлауынша, мәлімет жарияланған сәтте аспанда тағы 30-ға жуық ресейлік дрон болған.
Күндізгі шабуыл Ресей украин қалаларын тыным таппай атқылап жатқан кезге тұспа-тұс келді. 31 қазанға қараған түні Ресей 134 шабуылдаушы дрон жіберген, 20 жерге соққы тиген. Ал 30 қазан күні кешке ресейлік дрондар Киевтегі ЖЭО-ға соққы берген. Сол кезде қаланың төрт ауданының бір бөлігі жарықсыз қалып, су қысымы төмендеген еді. Елорданың бейбіт тұрғын үй аудандары мен энергетикасына жасалған шабуылдар – Ресейдің бейбіт халыққа қарсы лаңкестік соққылары.
Бұл – шұғыл жаңалық, шабуыл жалғасып жатыр. Толық мәлімет пен салдары туралы келесі жарияланымдарда хабарлаймыз.
