Қазақстан министрліктері қызметкерлерінің орташа жалақысы ең төменгі күнкөріс деңгейінен 4,9–12,2 есе асады. «Радиоточка» Үкіметтің баспасөз қызметтерінен табыс жөнінде дерек сұратып, осындай нәтиже алды. Сұранысқа жеті ведомство жауап берді.
Қаржы министрлігінің есебі бойынша, 2016 жылы ең төменгі күнкөріс деңгейі 22 859 теңге болды. Бұл — тұтыну себетінің құнына тең, бір адамға шаққандағы ең аз табыс. Салыстыру үшін басылым Ұлы Отан соғысы кезіндегі әскери тұтқын азығы қазіргі бағамен шамамен 17,7 мың теңге тұратынын есептеді. Ал ІІМ Қылмыстық-атқару жүйесі комитетінің дерегінше, бір сотталушыны ұстауға айына 60 мың теңге жұмсалады, оған қызметкерлердің жалақысы, тамақ, киім-кешек және коммуналдық қызметтер кіреді.
Алынған мәліметке қарағанда, ең көп жалақы Қаржы министрлігінде: 360 қызметкер орта есеппен 280 500 теңге алады, бұл ең төменгі күнкөріс деңгейінен 12,2 есе көп. Екінші орында Білім және ғылым министрлігі: 223 қызметкер, 264 975 теңге (11,5 есе). Мемлекеттік қызмет істері министрлігінде 137 қызметкер 200 000 теңге (8,7 есе), Ауыл шаруашылығы министрлігінде 268 қызметкер 173 642 теңге (7,5 есе) алады.
Одан кейін Энергетика министрлігі — 305 қызметкер және 148 500 теңге (6,4 есе), Қорғаныс министрлігі — 400 қызметкер және 133 000 теңге (5,8 есе). Жауап бергендердің ішінде ең аз жалақы ІІМ-де: 350 қызметкер орта есеппен 112 905 теңге алады, бұл ең төменгі күнкөріс деңгейінен 4,9 есе көп.
Ең жабық ведомство Мәдениет және спорт министрлігі болды: ол тіпті қызметкерлер санын да айтудан бас тартты. СІМ, Әділет министрлігі, Инвестициялар және даму министрлігі, Ұлттық экономика министрлігі мен Денсаулық сақтау министрлігі қызметтік ақпарат деп сылтауратып, жалақы мөлшерін ашпады.
Материал авторы Ксения Бондал кекесінмен қорытынды жасады: не халық тым бай, не күнкөріс деңгейіне бір нөл жетпейді.
«Радиоточка» материалдары бойынша.
