Қайта құрылған министрліктер мен ведомстволар жаңа мөрлері мен фирмалық бланкілері әлі жоқ екенін алға тартып, азаматтар мен ұйымдарға рұқсат құжаттарын беруді тоқтатты. Мәжіліс депутаттары мұны қолданыстағы заңдарды бұзу деп санайды және үкіметтен өтпелі кезеңде мемлекеттік органдардың жұмысын қамтамасыз етуді талап етіп отыр.
Мәжіліс екі заң жобасын екі оқылымда қабылдады: «Қазақстан Республикасының Үкіметі туралы» Конституциялық заңға түзетулер енгізу туралы және мемлекеттік басқару деңгейлері арасындағы өкілеттіктерді ажырату туралы. Енді оларды сенат қарауы тиіс. Министрліктер, агенттіктер мен комитеттер шешім күтіп, парламентшілер түзетулер төңірегінде дауласып жатқанда, рұқсат алуға құжат тапсырғандар бәрінен көп зардап шегіп отыр.
Мәжіліс депутаты, бұрынғы әділет министрі Зағипа Балиева заң жобаларының таныстырылымында ведомстволар «өтпелі кезеңде» де жұмыс істеуі керек екенін талап етті. «Үкімет үздіксіздікті қамтамасыз етуі тиіс еді, өйткені заңды ешкім жойған жоқ», — деді ол. Балиева рұқсаттарды ескі бланкілермен беруді талап етуге кеңес берді: олар әлі де жарамды.
Оны депутат Меруерт Қазбекова қолдады. Оның айтуынша, өтпелі кезеңде мемлекеттік қызмет әдеттегі режимде жұмыс істеуі керек, жаңа министрліктер құрылып қойған және мұндай мәселелерді шешуге міндетті. Мемлекеттік орган белгіленген мерзімде жауап бермесе, прокуратураға жүгіну керек.
Айтқүл Самақова бәрі нақты шенеуніктерге байланысты деп санайды. Функциялар басқа министрлікке өткенде, рұқсат беретін қызметкерлер де сонда ауысады. Ескі бланкілер жарамды, ал оның пікірінше, басты себеп — орындаушылардың «істен хабары жоқ».
«Ақ жол» фракциясының жетекшісі Азат Перуашев рұқсат беру мәселелерін екінші оқылымда қабылданған өкілеттіктерді ажырату туралы заң шешеді деп есептейді. Оның сөзінше, кәсіпкерлер өздеріне байланысты емес жағдай үшін жауап бермеуі керек. Лицензиялау өңірлік деңгейге беріледі: бұл рәсімдерді жеңілдетеді, бірақ сыбайлас жемқорлық тәуекелін туғызады, сондықтан шенеуніктердің дербес жауапкершілігін күшейту қажет.
«Халық коммунистері» фракциясынан Айқын Қоңыров болып жатқан жағдайды «парадокс немесе заңдық казус» деп атады. Ол қайта құрудағы асығыстықты, стратегиялық жоспарлаудың әлсіздігін, міндеттердің өңірлерге ысырылуын, сондай-ақ стандарттарды бұзғаны үшін кімді жауапқа тарту керегі белгісіз екенін айтты. Оның сөзінше, мөрді бір сағатта жасауға болады, ал мәселе қайта тіркеуде болуы мүмкін.
Заң жобаларын әзірлеген ведомствоның басшысы, Ұлттық экономика министрі Ерболат Досаев депутаттармен келіспеді. Оның айтуынша, қазір берілген құжаттар заңсыз болар еді: өкілеттіктерді жұма күні үкімет қаулысы бекітеді, ал министрліктер олар бойынша дүйсенбіден, 22 қыркүйектен бастап жұмыс істейді.
«Радиоточка» материалдары бойынша.
