Қазақстандық «Матен Петролеум» мұнай компаниясы қайтадан сатылымға шығарылды. Бұған дейін БАҚ Қазақстан үкіметі компания акцияларының 95 пайызын қытайлық Hainan Zhenghe Industrial Group Co Ltd компаниясына сатуды мақұлдады деп жазған. Алайда сатып алушы голландиялық компания болып шықты.
«Компания акцияларының 95 пайызы шынымен сатылады, бірақ қытайлық компанияға емес, голландиялық компанияға», – деді «Матен Петролеум» өкілі. Оның айтуынша, салалық министрліктің рұқсаты алынған, ұлттық компаниялардың басым сатып алу құқығы болған, бірақ олар оны пайдаланбаған. Мәмілені жабуға жарты жыл берілген. Компания өкілі сатып алушының атауын айтпады, тек: «Голландиялық компанияның түпкілікті бенефициарлары Қазақстаннан емес», – деп атап өтті.
Қытай БАҚ-ының мәліметінше, сатып алушы – Hainan Zhenghe компаниясының еншілес кәсіпорны, голландиялық Energy Group B.V., ал мәміле сомасы 525,8 млн доллар. Бұған дейін 380 млн доллар деген сан айтылған. «Мәміле сомасы 380 миллион АҚШ долларынан жоғары болады, компанияның нарықтық капиталдандыруы – 493 млн доллар», – деді «Матен Петролеум» өкілі.
2013 жылдың тоғыз айында компанияның активтері 316,1 млн долларды, түсімі 306,3 млн долларды, жалпы пайдасы 244 млн долларды, таза пайдасы 80,4 млн долларды құрады. 2012 жылғы дивиденд 13 млрд теңге болды. Компанияның Атырау облысындағы Қара Арна (2023 жылғы 19 ақпанға дейін), Шығыс Қоқарна (2028 жылғы 1 қаңтарға дейін) және Матин (2020 жылғы 13 қазанға дейін) кен орындарына лицензиясы бар.
«Матен Петролеумның» негізгі акционері – акциялардың 60 пайызына иелік ететін Дінмұхамед Идрисов. Ол сондай-ақ «Аманат Иншуранс» сақтандыру компаниясының бас директоры әрі «Ордабасы мұнай» компаниясының құрылтайшысы. Forbes Kazakhstan журналының 2013 жылғы рейтингтерінде Идрисов Қазақстанның ең ықпалды 50 бизнесменінің ішінде 16-орынға, ең бай 50 адамының ішінде 17-орынға ие болған.
2013 жылғы 31 желтоқсанда директорлар кеңесі Ресей Сбербанкіне 180 млн долларлық жаңартылмайтын кредит желісін Libor 3M + 3,25% мөлшерлемемен үш жылға дейінгі мерзімге сұрап жүгінуді мақұлдады. Кепілге Vitol Central Asia компаниясымен жасалған келісімшарттар бойынша экспорттық түсімнің 100 пайызына құқық, банктің қаражатты акцептісіз есептен шығару құқығы және Идрисовке тиесілі 4800 акцияның 4160-қа жуығы беріледі. Басылымның бағалауынша, компанияның пайдасы бұл кредитті үш жылда өтеуге жетеді.
2011 жылы «Матен» тобы «АТФБанктен» 100 млн доллар кредит алып, оған өз қаражатын қосып, «Ордабасы мұнайдан» Атырау облысындағы үш кен орнын 167 млн долларға сатып алған. Бұл кен орындары 1990 жылдардың соңында «Ембімұнайгаздан» алынған еді. Материалда айтылғандай, жергілікті экологтар кен орнындағы мұнай дақтарына назар аударып отыр.
«Радиоточка» материалдары бойынша.
