Алматыдағы барахолкада болған ірі өрттің себебі қасақана өртеу болып шықты. Бұл туралы 26 қарашада Қазақстан Төтенше жағдайлар министрлігі мен қалалық төтенше жағдайлар департаменті хабарлады. Бөтеннің мүлкін өртеу арқылы қасақана жою туралы қылмыстық іс ішкі істер органдарына жолдау үшін прокуратураға берілді.
ТЖД мәліметінше, «Құлагер» базарынан бір-біріне байланысы жоқ бірнеше өрт ошағы табылған. Ошақтардағы күлге жасалған жедел талдау тез тұтанатын және жанғыш сұйықтықтардың іздерін анықтады.
Базар күзетшілері сауал кезінде өрт кезінде бөгде адамдар болмағанын айтқан. Өрт сөндірушілерді олар өрт басталғаннан кейін бір сағаттан соң ғана шақырған. ТЖД күзетшілер өртті өздері сөндіреміз деп ойлаған болуы мүмкін деп болжады.
Өрт 16 қарашадан 17 қарашаға қараған түні басталған. Оның аумағы 3800 шаршы метрге жетті, алдын ала мәлімет бойынша бір адам зардап шекті. Өртті Алматы ТЖД-ның 300 қызметкері мен 41 техника бірлігі сөндірді. «Қазавиақұтқару» компаниясының Ка-32 тікұшағы қараңғы түскенге дейін 3 тоннадан 49 рет су төкті, қалалық құтқару қызметінің тікұшағы тағы 17 рет су шашты. ТЖМ қызметкерлері тобын төтенше жағдайлар вице-министрі Жанболат Смайылов басқарды.
«Радиоточка», Tengrinews.kz материалдары бойынша.
