Kaspi.kz 2026 жылғы шілде–қыркүйекте 281 млрд теңге таза пайда тапты — бұл бір жыл бұрынғымен шамалас. Түсім 1,1 трлн теңге болды. Валюта бағамының ауытқуын есептемегенде ол 18%-ға өскен, бірақ теңгемен алғанда өткен жылғы деңгейде қалды. Нәтижені Kaspi-ге тиесілі Hepsiburada маркетплейсі жұмыс істейтін түрік лирасының арзандауы төмен тартып отыр. Бұл деректерді компания 9 қарашада жариялаған үшінші тоқсандағы есебінде келтірді.
Kaspi 2026 жылға арналған маркетплейс болжамын төмендетті: алаңның айналымы (GMV — ол арқылы сатылған барлық тауар мен қызметтің құны) енді бағам әсерін есептемегенде шамамен 12%-ға өседі. Түзетілген EBITDA, яғни пайыздарды, салықтарды және амортизацияны шегергенге дейінгі пайда өсімі бойынша болжамды компания шамамен 5% деңгейінде сақтап қалды.
Үшінші тоқсанда маркетплейс айналымы 8%-ға өсіп, 2,2 трлн теңгеге жетті, ал оның түсімі 20%-ға артып, 466 млрд теңге болды. Табыс сатылымнан жылдам өсіп жатыр, өйткені сатушылар алаңға көбірек төлейді. Онлайн-саудадағы орташа комиссия, яғни Kaspi сатылымнан алатын үлес, бір жылда 2,1 пайыздық тармаққа өсіп, 16,3%-ға жетті. Бұған негізінен жарнама мен жеткізуден түсетін табыс ықпал етті. Kaspi арқылы өткен төлемдер көлемі 14%-ға ұлғайып, 13,6 трлн теңге болды, төлем бағытының түсімі 6%-ға өсіп, 182 млрд теңгеге жетті.
Елдегі ең ірі банктердің бірі Kaspi Bank-тің несиелері мен депозиттерін қамтитын финтех бағыты 489 млрд теңге түсім әкелді, бұл бір жыл бұрынғыдан 19%-ға көп. Орташа несие портфелі 14%-ға өсіп, 7,5 трлн теңгеге жетті. Тоғыз айдағы проблемалы несиелер үлесі 6,9% болды, ал 2025 жылдың қорытындысы бойынша 6,1% еді. Kaspi тамыз бен қазанда үш айлық депозит мөлшерлемесін екі рет, әр жолы 1 пайыздық тармаққа төмендетті. Мұндай салымдар барлық депозиттердің шамамен үштен бірін құрайды. Соған қарамастан клиенттердің жинақтары 21%-ға өсті, ал тартылған қаражаттың орташа құны бір жылда 1,5 тармаққа көтеріліп, 14,9%-ға жетті.
Директорлар кеңесі кезекті тоқсандық дивиденд ретінде бір акцияға (ADS) 1 000 теңге төлеуді ұсынды, шешімді акционерлер бекітуі тиіс. Kaspi 2025 жылдың басында дивиденд төлеуді тоқтатып, 2026 жылы қайта бастаған: бірінші тоқсан үшін 850 теңгеден, екінші тоқсан үшін 1 000 теңгеден төленді.
Компания 2027 жылдың соңына қарай Қазақстанның тоғыз қаласында 300-ге жуық Magnum Daily дүкенін ашуды, ал орта мерзімде олардың санын бүкіл ел бойынша 3 000-ға жеткізуді көздейді. «Біз бизнестеріміздің күшіне және олардың ұзақ мерзімді өсу әлеуетіне әлі де сенімдіміз», — деді Kaspi.kz басшысы Михаил Ломтадзе. Компанияның Қазақстан мен Түркиядағы қызметтерін 27 миллионнан астам адам пайдаланады.
