Беларусьтің «Белавиа» әуе компаниясы Қазақстанның авиация билігінен Минск – Алматы – Минск бағыты бойынша тұрақты рейстер орындауға рұқсат алды. Алғашқы рейс 2015 жылғы 30 сәуірге белгіленген.
Рейстер аптасына екі рет эконом-класта 189 орны бар Boeing 737-800 ұшағымен орындалады. B2 767 рейсі Минскінің Ұлттық әуежайынан сәрсенбі және сенбі күндері сағат 20:25-те ұшып, Алматыға келесі күні сағат 4:10-да жетеді. B2 768 кері рейсі Алматыдан бейсенбі және жексенбі күндері таңғы 5:10-да ұшып, Минскіге сағат 7:20-да қонады.
Тасымалдаушының ресми сайтында көрсетілгендей, екі жаққа ұшу салықтар мен алымдарды қоспағанда шамамен 65 мың теңге тұрады.
Минск арқылы ауысып отырып, Еуропаға да ұшуға болады. Алымдарды қосқанда Алматыдан екі жаққа билеттің ең төменгі бағасы: Римге – 87 125 теңге, Миланға – 85 281, Амстердамға – 82 824, Прагаға – 76 834, Калининградқа – 74 928 теңге. Туристік фирмаларда баға өзгеше болуы мүмкін, сондықтан оны сапар алдында нақтылаған жөн.
Алматы «Белавиа» ұшатын Қазақстанның бесінші қаласы болмақ: әуе компаниясы бұған дейін Астанаға, Павлодарға, Қарағандыға және Қостанайға рейс жасап келеді.
«Радиоточка» материалдары бойынша.
