Алматыда Зенков көшесіндегі 77-үйдің қасбетіне Кеңес Одағының Батыры, Ұлы Отан соғысының қатысушысы Василий Бенбериннің құрметіне ескерткіш тақта орнатылды. Ол бұл үйде өмірінің соңғы 20 жылын өткізген, деп хабарлайды «ҚазАқпарат» ХАА.
Батырдың ұлы Валерий Бенбериннің айтуынша, әкесі Қазақстанда туған, соғыстан кейін еліне оралып, жарақаттарына қарамастан еңбек еткен. Майданда ол Кеңес армиясының ең көп орден алған бөлімдерінің бірі – 44-гвардиялық танк бригадасында барлау танкінің командирі болған.
КСРО Жоғарғы Кеңесі Төралқасының 1945 жылғы 27 ақпандағы Жарлығымен неміс-фашист басқыншыларына қарсы күрестегі ерлігі мен батылдығы үшін гвардия кіші лейтенанты Василий Бенберинге Ленин ордені мен «Алтын Жұлдыз» медалі тапсырылып, Кеңес Одағының Батыры атағы берілген.
«Әкем алты рет жараланып, Одер өзенінен өту кезінде қолынан айырылды», — деді Валерий Бенберин. Танкист жанып жатқан танктен шығып келе жатқанда мерген оғы омыртқасына тиіп, қолына рикошет жасаған. Ол Берлинге 60 шақырым жетпей қалды: Жеңіс күнін госпитальде қарсы алып, үйіне тек 1947 жылы оралды.
Майдангер өзінің туған күнін нақты білмеген, әкесінің айтуынша, ол мамыр айында туған. Соғыстан кейін Василий Бенберин туған күнін 9 мамырда атап өтетін. Биыл оған 97 жас толар еді.
Батырдың ұлы дәрігер болды: әкесі оған бейбіт мамандық таңдауға кеңес беріп, өзі «бүкіл әулет үшін соғысып болдым» дейтін. Валерий Бенбериннің айтуынша, тақтаның орнатылуы мемлекеттің ардагерлерге және олардың рухына деген қамқорлығының дәлелі, ал батырлардың есімін мәңгі есте қалдыру патриотизмді нығайтады.
«Радиоточка» материалдары бойынша.
