Алматыдағы «Ақсай» балалар ауруханасының қызметкерлері клиника корпустарын өз күшімен жөндеп жатыр. Күрделі жөндеуге арналған 2,2 млрд теңгелік смета бекітілмеген соң дәрігерлер, мейірбикелер мен санитарлар жұмысқа өздері кірісті. Қаржының бір бөлігін Асфендияров атындағы Медицина академиясы бөлді, демеушілер мен еріктілер көмектесіп жатыр, қызметкерлердің өздері де қаражат салуда. Бірнеше корпус жөнделіп үлгерді.
Аурухана 1955 жылы салынған. Ол кезде ол Республикалық жұқпалы аурулар балалар ауруханасы «Ақсай» деп аталып, КСРО-дағы полиомиелит індетіне қарсы күрестің орталығы болған. Мұнда полиомиелит, энцефалит, балалар церебралдық сал ауруы мен сколиозға шалдыққан балалар емделді, тіпті оларға арнап мектеп салынды. 1988 жылы гемодиализ бөлімшесі ашылды, ол жақын уақытқа дейін Қазақстандағы жалғыз мамандандырылған балалар бөлімшесі еді. 1993 жылы Семей өңірінен келген балаларды емдейтін «Экология және балалар» бөлімшесі, 2002 жылы аллергия орталығы ашылды. Қазір клиника 300 төсекке арналған, мұнда жыл сайын елдің түкпір-түкпірінен келген бес мыңнан астам бала ем алады.
Соңғы жылдары аурухана тозып кетті. Аумағы 63 гектар саябақтан аз ғана бөлігі қалды: ағаштар коттедж қалашығы үшін кесілді. Бюджет қысқарды, корпустарда құбырлар ағып, сантехника бұзылды, аязда жылу берілмей қалған кездер болды, қабырға мен төбеге зең шықты. Бірнеше жыл бұрын клиника Асфендияров атындағы Медицина академиясының балансына берілді.
Бас дәрігер Ирина Брежневаның айтуынша, қаржыландыру мен төсек саны жыл сайын азайып келген. Ауруханаға көп шығын кетеді: оның өз қазандығы мен су тартқышы бар. Бұрынғы саябақтың орнындағы кент аурухананың жылуын, суын және электр қуатын пайдаланып келген, қарыз салдарынан жылу мен жарықты өшіруге тура келген. Бас дәрігердің сөзінше, бір жарым жылда қарыздар өтелді, академия бюджетінен клиникаға 1,5 млрд теңгеден астам қаржы салынды. Академия ректоры Айкан Аканов құжаттарды әзірлеп, 2 млрд 200 млн теңгеге күрделі жөндеу сметасын дайындаған, бірақ бұл сомадан бас тартылды.
«Елде дағдарыс екенін түсінеміз, тек өзімізге сенуге тура келеді», – деді Брежнева. Оның айтуынша, қызметкерлер жөндеуге өздері кірісті, өйткені олар «бұл бірегей аурухана әрі өз жұмыс орны екенін түсінеді». Қазақстанда балаларға арналған гемодиализ орталығы екеу ғана – «Ақсайда» және Астанада.
Бас дәрігер журналистерді жарты жылдан кейін келуге шақырып, аурухананы танымай қаласыздар деп уәде берді.
«Радиоточка» материалдары бойынша.
