Google бағдарламалауға, деректерді талдауға және ғылыми міндеттерге арналған Gemini 4 отбасының жаңа моделі — Gemini 4 Neon-ды таныстырды. Модельдің іске қосылғанын 18 қарашада Google DeepMind аға вице-президенті Корай Кавукчуоглу Google блогында хабарлады. Астана уақытымен модель 19 қарашаға қараған түні шықты.
Gemini 4 желісінде Neon басқа екі модельдің арасынан орын алды. Google Carbon-ды ең күрделі әрі ұзақ жобаларға, Hydrogen-ды күнделікті жылдам міндеттерге арналған модель деп атайды, ал компанияның сипаттауынша, Neon ойлау тереңдігі мен жылдамдықты ұштастырады. Google-дың мәлімдеуінше, ол флагмандық модельдерге жақын деңгейде ойлайды, бірақ жылдамырақ жұмыс істейді әрі арзанға түседі.
Google өз нәтижелерін тәуелсіз рейтингтерге сүйеніп келтіреді. Компания деректері бойынша, ойлаудың ең жоғары деңгейінде Neon Artificial Analysis Intelligence Index-те 61 ұпай жинап, жалпы есепте үшінші орын алды. Бағдарламалауға арналған ЖИ-агенттердің Artificial Analysis Coding Agent Index рейтингінде модель 58,6 ұпаймен бірінші орынға шықты, ал Vals Index-те 70,9% нәтижемен екінші орынға ие болды.
Пайдаланушылар үшін бұл нені білдіреді. Gemini қосымшасында жаңа модельді модельдер тізімінен таңдауға болады, бірақ тек Google AI Pro немесе Ultra ақылы жазылымымен. Әзірлеушілерге Neon Google AI Studio мен Android Studio-дағы ақылы Gemini API арқылы, компанияларға Gemini for business арқылы қолжетімді. Әзірлеушілер үшін бағасы — миллион кіріс токені үшін 3 доллар (шамамен 1 332 теңге), миллион шығыс токені үшін 15 доллар (шамамен 6 662 теңге). Модель бір мезетте 1 млн токенге дейін өңдейді. Тегін пайдаланушылар туралы Google бөлек ештеңе хабарламады.
Бұдан бөлек, Google Neon-ның киберқауіпсіздікке арналған нұсқасын әзірлеп жатыр: алдағы күндері оны Fairwind бағдарламасы аясында тексерілген жүйе қорғау мамандары алады. Компания деректері бойынша, бұл нұсқа кодтағы осалдықтарды тауып, оларды түзетуге көмектеседі, ал Neon-ның теріс пайдаланудан қорғанысы Carbon деңгейінде.
Neon — Gemini 4 отбасының төртінші моделі. Өткен аптада Google Gemini 4 Hydrogen-ды шығарып, өз іздеу жүйесін соған көшірді.



