Шығыс Қазақстан облысында полицейлер дронның көмегімен 30 жылқыдан тұратын үйірді тапты. Иесі оларды үш аптадан астам уақыт өзі іздеп, таба алмаған. Іздеу бірнеше сағатқа ғана созылды, жануарлардың бәрі иесіне қайтарылды, деп хабарлайды Polisia.kz.
Оқиға Марқакөл ауданында болды. Ақбұлақ ауылының тұрғыны жылқыларын ұзақ уақыт өз күшімен іздеді, бірақ нәтиже болмады. Ақыры ол көмек сұрап аудандық полиция бөліміне барды.
Полицейлер іздеуді бірден бастады. Аумақ кең, жер бедері күрделі болғандықтан, ұшқышсыз ұшу аппаратын әуеге көтеруге шешім қабылданды. Дрон әдеттегі іздеу кезінде жету қиын жерлерді де шолып шықты.
Нәтиже сол күні-ақ шықты: полицейлер 30 жылқының бәрін тапты. Жануарлар аман-есен екен, олар иесіне қайтарылды. Үйір иесі полицейлерге жедел көмектескені үшін алғыс айтты.
Полицияның айтуынша, ұшқышсыз ұшу аппараттары жұмыста маңызды құралға айналып келеді: олардың көмегімен кең аумақты шолу және жоғалған малды іздеу оңайырақ. Мал иелеріне малды қараусыз қалдырмау керегі, ал мал жоғалса, бірден полицияның 102 нөміріне хабарласу қажеттігі ескертілді.
ШҚО үшін бұл алғашқы жағдай емес. Тамызда Ұлан ауданының полицейлері де дронның көмегімен еркін жайылымнан кетіп қалған 12 жылқыны тапқан еді: үйір жоғалған жерінен 27 км қашықтықтан табылып, иесіне қайтарылды.



