«Астон Вилла» Нидерланды құрамасының 24 жастағы сол жақ қорғаушысы Иан Матсенмен келісімшартты 2032 жылға дейін ұзартты. Бұл туралы клуб хабарлады. Матсен бирмингемдік клубта 2024 жылдың жазынан бері ойнап жүр.
Футболшы келісімшартты ұзартуының себебін клубтың дамуымен байланыстырды. «Мен мұнда өзімді үйдегідей сезінемін және осында дами аламын. Бұл мені осы клубпен ерекше жетістіктерге жетуге ынталандырады, сондықтан келісімшартқа қол қойдым», — деді Матсен клуб сайтына. Ол бас бапкер Унаи Эмериді де жоғары бағалады: «Маған бұл қатты ұнайды. Ол өте талапшыл, бірақ егжей-тегжейге шын мәнінде үңілетін өте жақсы бапкер. Ол бәрінің бір толқында болып, бір жоспармен әрекет етуін қалайды және бұл нәтиже береді. Арамызда өте жақсы қарым-қатынас бар». Қорғаушы «Вилладағы» ең есте қаларлық сәті ретінде өткен маусымдағы Еуропа лигасы финалындағы жеңісті атады: «Алаңда — бәлкім, Еуропа лигасының финалы. Клуб үшін үлкен кубок».
Матсен «Астон Виллаға» «Челсиден» 2024 жылдың жазында шамамен 37 млн фунтқа (21,9 млрд теңгедей) ауысқан. Алғашқы екі маусымда ол құрамдағы орын үшін кейін «ПСЖ»-ға кеткен Люка Диньмен бәсекеге түсті. Қазір жарақаттарға қарамастан нидерландтық Эмеридің негізгі сол жақ қорғаушысы.
Клуб ойыншылармен келісімшарттарды ұзартуды жалғастырып жатыр: Виктор Линделёф 2028 жылға дейін, Джордж Хеммингс 2031 жылға дейін келісімге қол қойды. Британ баспасөзінің мәліметінше, Эмилиано Буэндиямен, Амаду Онанамен және Эмеридің өзімен келіссөздер жүріп жатыр, ал Росс Барклидің келісімшарты келесі жылы аяқталады.
