Қарашаның алғашқы 10 күнінде Қазақстан полициясы заңсыз айналымнан 200 кг-нан астам есірткі тәркілеп, 35 күдіктіні ұстады, деп хабарлады ІІМ. Ведомство есебінше, бұл шамамен жарты миллион шартты бір реттік доза.
Тәркіленгеннің негізгі бөлігі — 190 кг марихуана. Тағы шамамен 13 кг синтетикалық есірткі мен 4 кг гашиш алынды. Онкүндік ішінде полицейлер барлығы 56 есірткі құқықбұзушылығын анықтады, оның 35-і — қылмыс.
| Неліктен ұсталды | Адам |
|---|---|
| Есірткі өткізу | 19 |
| Контрабанда | 8 |
| Аса ірі мөлшерде есірткі сақтау | 3 |
| Улы заттардың заңсыз айналымы | 3 |
| Құрамында есірткі бар өсімдіктерді өсіру | 1 |
| Есірткіні насихаттау және жарнамалау | 1 |
ІІМ бірнеше ірі ұстау туралы айтып берді. Павлодарда полицейлер 32 жастағы әйелді ұстады: жеке тінту кезінде одан 1,5 кг-ға жуық α-PVP және шамамен 30 грамм мефедрон тәркіленді. Полиция мәліметінше, ол әлеуметтік желіден есірткі курьері болып жұмыс істеу туралы ұсынысты тауып, есірткі өткізу үшін Алматыдан Павлодарға әдейі келген.
Шымкентте 21 жастағы жергілікті тұрғын ұсталды — жеке тінту кезінде одан шамамен 500 грамм синтетикалық есірткі табылды. Алдын ала деректер бойынша, ол оларды қалада өткізбек болған. Алматыда полицейлер 56 жастағы жергілікті тұрғынды ұстады: оның көлігі мен пәтерін тінту кезінде 220 грамнан астам кетамин психотроптық заты тәркіленді.
«Ішкі істер министрлігі есірткінің таралуына сенімді тосқауыл қоюға, сондай-ақ жас ұрпақтың денсаулығы мен ұлттың болашағына қауіп төндіретін есірткі ортасына тартылуының алдын алуға бағытталған кешенді шараларды жүзеге асыруды жалғастырады», — деді ведомстводан.



