Димаш Құдайберген 20 қарашада Мехикодағы Palacio de los Deportes аренасында DIMENSIONS әлемдік турының екінші концертін берді, осымен турдың Мексикадағы бөлігі аяқталды. Әнші бір әннің алдында залға соғыс пен бейбітшілік туралы сөз арнады. Бұл туралы DimashNews ресми порталы хабарлады.
Бұл сөздер әншінің өзі жазған «The Story of One Sky» әнінің алдында айтылды. Димаштың айтуынша, ол бұл туындыны 25 жасында жаза бастаған, жұмыс үш жылға созылған. «Шынымды айтсам, біздің әлем соғыстардан әбден шаршады… Қай ұлттың, қай елдің өкілі екеніңіз маңызды емес. Мен қазақпын және қазақ екенімді мақтан тұтамын. Бірақ мен үшін сіздің кім екеніңіз, қайдан екеніңіз маңызды емес. Мен әрқайсыңызды құрметтеймін. Қайдан келгеніңіз маңызды емес. Мен бәріңізді жақсы көремін, өйткені біз бәріміз — Құдайдың балаларымыз. Біз құдіретті емес екенімізді есте ұстауымыз керек. Біз жай ғана адамбыз. Болды. Біз бір-ақ рет өмір сүреміз, солай емес пе? Ендеше өмірімізді жақсырақ сүрейік», — деді әнші.
Димаш мексикалық көрермендерге сахнадан алғыс айтты: «Мексикадағы барлық жанкүйерлеріме үлкен рахмет! Бұл — менің осы алаңдағы үшінші концертім. Өткен жылғы алғашқы концерт есімде — мен жай ғана таңғалдым! Сіздер ғажап, өте жылы көрерменсіздер. Рахмет сіздерге!» Мексика астанасындағы екінші кеш қосымша концерт болды. Оған бір сағат қалғанда әнші Instagram-да видео жариялап, испан тілінде былай деп жазды: «Мехикодағы кешегі концерт жай ғана керемет болды! Эмоцияға, сиқырға және күтпеген тосынсыйларға толы түн! Бірақ бұл әлі бәрі емес! Бүгін бізді қосымша концерт күтіп тұр! Мехико, бір сағаттан кейін кездесеміз!»
Шоудың ерекше нөмірі — қазақ тіліндегі «Өмір» балладасы. Әннің сөзі мен әуенін Димаш өзі жазған, оны алғаш рет 29 жасқа толған күні орындаған. Жаңа турда бұл әнді бір мезетте үш Димаш айтады: ақ роялда сүйемелдеп отырған әншіге виртуал кейіпкерлер — оның балалық және қарттық шағындағы бейнесі қосылады. Бала мен қарт адамның партияларын да әншінің өзі жазып алған. Сыбызғыда Санжай Әлмішев ойнайды.

Мехико турдағы Мексиканың соңғы қаласы болды: оған дейін Димаш Мерида, Монтеррей және Гвадалахарада өнер көрсетті. Мексика астанасындағы алғашқы концертте, 19 қарашада, оған WBC-дің құрметті белбеуі табысталды, ал шоу қарсаңында әнші испан тілінде ән жазғысы келетінін айтқан. Турне әрі қарай Колумбия, Чили және Перуда жалғасады. «Сәлем, Колумбия. Ертең кездесеміз», — деп жазды Димаш 21 қарашада Instagram парақшасында.
Димаш Құдайберген 32 жаста, ол — Қазақстанның халық әртісі. DIMENSIONS — оның жаңа концерттік шоуы, бағдарламасында әншінің қазақ тіліндегі авторлық әндері орындалады.



