Мазмұнға өту
2026 жылғы 16 қараша, дүйсенбі

Астанада «01 market» ломбардтары лицензиясыз қарыз берген

Заңсыз қызметтен түскен табыс 102 млн теңгеден асты, ал ықтимал тәркілеу үшін екі пәтер, үш көлік және екі кеңсе тұтқындалды.

Расследование АФМ по делу сети ломбардов «01 market» в Астане
Фото: Агентство РК по финансовому мониторингу

Қаржылық мониторинг агенттігінің Астана қаласы бойынша департаменті «01market» ломбардтар желісін ұйымдастырушыға қатысты тергеуді аяқтады. Тергеу деректеріне қарағанда, желі 2021 жылдан бері комиссиялық сауданың атын жамылып, микроқаржы қызметіне міндетті лицензиясыз мүлік кепілімен қарыз беріп келген. Қылмыстық іс сотқа жолданды, деп хабарлады ҚМА.

Қарыздар бақылаудағы «INVEST PRO KZ» ЖШС, «Исмагулов Р.Б.» ЖК және «Pro Kz» ЖК арқылы рәсімделген. Операциялардың шын мәнін жасыру үшін клиенттерге комиссиялық мәміле сияқты көрінетін кепіл билеттері берілген. Ақша қолма-қол төленген, ал пайыздар, қарызды ұзарту ақысы мен айыппұлдар осы компаниялар мен кәсіпкерлердің шоттарына түскен.

Қарыз 30 күнге, күніне 0,25%-ға дейінгі сыйақымен берілген. Мерзімі өтіп кетсе, қосымша айыппұл есептелген, ал клиент оны төлемесе, кепілдегі мүлік сатылған.

Тергеу есебінше, заңсыз қызметтен түскен табыс 102 млн теңгеден асқан. Мүлікті ықтимал тәркілеуді қамтамасыз ету үшін сот санкциясымен екі пәтер, үш автокөлік және екі кеңсе үй-жайы тұтқындалды.

Қазақстанда мүлік кепілімен қарызды тек микроқаржы қызметіне лицензиясы бар ұйымдар ғана бере алады. Комиссиялық дүкен атын жамылған ломбард схемасы ҚМА үшін жаңалық емес: бұған дейін агенттік күніне 2%-бен қарыз берген «Альби» ломбардтар желісін әшкерелеген, ал қаржы реттеушісі қарыз алушылардың құқығын бұзғаны үшін жеті микроқаржы ұйымының лицензиясын кері қайтарып алған.

БөлісуTelegramWhatsAppVKFacebookX

Сондай-ақ оқыңыз