Миллиардер Тимур Турлов «Қазақстанның астық консорциумының» бас компаниясы Ak Zhayik Capital ЖШС-ның кемінде 51% үлесін сатып алуға келісті. Консорциум – елдегі ең ірі агрохолдингтердің бірі. Мәміле құны – 300 млн доллар, ресми бағам бойынша шамамен 134 млрд теңге. Консорциум иесі Бахтияр Оспановпен алдын ала келісімге 5 қарашада қол қойылған. Бұл туралы Турлов 9 қарашада АҚШ-тың Бағалы қағаздар және биржалар жөніндегі комиссиясына (SEC) тапсырған құжатта айтылған.
Турлов қолма-қол ақша төлемейді: ол Оспановқа Freedom Holding Corp. компаниясындағы өз акцияларын екі траншпен береді. Сатушы 2026 жылғы 31 желтоқсанға дейін кемінде 270 млн доллар, қалған 30 млн долларды 2027 жылғы 31 наурызға дейін алуы тиіс. Акциялар саны Nasdaq биржасындағы 20 сауда күнінің орташа бағасы бойынша есептеліп, 1,15-ке көбейтіледі. Оспанов бұл бағалы қағаздарды сата алады, ал түскен ақша 300 млн долларға жетпесе, айырмасын Турлов ақшалай төлейді. Үлесті Freedom Holding емес, кәсіпкердің жеке компаниясы Turlov Private Holding сатып алады.
Мәміле әлі түпкілікті емес: жекелеген тармақтарды қоспағанда, келісім тараптарға міндет жүктемейді, ал қорытынды құжаттарды әлі келісу керек. Сатып алушы компанияны 2027 жылғы 28 ақпанға дейін тексеруі тиіс, мәмілені жабудың соңғы мерзімі – 2027 жылғы 10 сәуір. Оған дейін консорциумды Оспанов басқарады, бірақ стратегияға қатысты шешімдерді сатып алушымен алдын ала жазбаша келіседі. Осы кезеңде ол үлесті басқа біреуге сата алмайды әрі кепілге бере алмайды.
Ak Zhayik Capital «Қазақстанның астық консорциумының» 99% үлесіне иелік етеді. Консорциум құрамында Ақмола және Солтүстік Қазақстан облыстарындағы 22 ауыл шаруашылығы кәсіпорны мен алты элеватор бар. Холдинг деректеріне қарағанда, оның жер қоры 910 мың гектарға жуық, егіс алқабы – 350 мың гектар, жылына 500 мың тоннадан астам өнім жинайды. Қалған үлес, яғни 49%-ға дейін, Kokzhiyek Fund LP қорында қалады. Forbes Kazakhstan мәліметінше, бұл қор «Бәйтерек» холдингіне қарасты Qazaqstan Investment Corporation құрамына кіреді.
Ықтимал мәміле туралы жазда да жазылған, бірақ ол кезде оны ешкім ресми түрде растамаған. Мамырда Оспанов Deloitte компаниясы 2024 жылғы деректер негізінде бүкіл бизнесті 242 млрд теңгеге бағалағанын айтқан. Freedom Holding Corp. акцияларының 64,91%-ы Турловқа тиесілі, ал Forbes Kazakhstan оның байлығын 5,2 млрд доллар деп бағалайды. Ол елдегі ең бай адамдардың қатарына кіреді.
