Су ресурстары және ирригация министрлігі «South Hydro Power» ЖШС-мен Түркістан облысында ГЭС каскады бар топтық су құбырын салу туралы келісімге қол қойды. Бұл туралы 29 қазанда министрлік хабарлады. Жоба Қазығұрт, Сарыағаш, Келес, Мақтаарал және Жетісай аудандарындағы 1 миллионнан астам тұрғынды таза ауыз сумен қамтуы тиіс.
Магистральдық су құбырының ұзындығы – 54,7 шақырым. Келісім бойынша құрылыс аяқталған соң ол мемлекет меншігіне тегін беріледі. Құжатта су тұтыну көлемі, жобаның инвестициялық және пайдалану кезеңдерінің мерзімі де бекітілген. Алайда нақты мерзімдер мен құрылыс құны министрлік хабарламасында айтылмаған.
Қуаты 72 МВт ГЭС каскады «жасыл» электр энергиясын өндіреді. Министрлік бұл өңірдегі энергия тапшылығын азайтуға септігін тигізеді деп есептейді. Құрылыстағы отандық өнімнің үлесі 90 пайыз болуы керек. Нысан стратегиялық су шаруашылығы нысандарының қатарына енгізілген.
Су ресурстары және ирригация министрі Нұржан Нұржігітов келісімді өңір тұрғындарының өмір сапасын арттыруға арналған маңызды стратегиялық қадам деп атады. Оның айтуынша, қосымша энергия қуаты Мемлекет басшысының Жолдауында берілген тапсырмаларды орындауға көмектеседі.
Жоба бірнеше жылдан бері әзірленіп келеді. 2025 жылғы мамырда министрлік техникалық-экономикалық негіздеменің дайын екенін хабарлаған еді. Ол кезде 12 шақырымдық туннель, Қазығұрт ауданының Жанабазар ауылында жинақтаушы су қоймасы мен тазарту құрылыстары, сондай-ақ Өгем өзенінде бес ГЭС-тен тұратын каскад салу жоспарланған. Министрлік су құбырының жобалық қуатын жылына 110 млн текше метр ауыз су деп көрсеткен.
Елде шағын гидроэнергетика да дамып келеді. Мысалы, Шығыс Қазақстан облысында инвестор қаржысына 11 шағын ГЭС салу жоспарланып отыр.
