Қазақстандық балуан Ирина Кузнецова Астанада өтіп жатқан әлем чемпионатын жүлдесіз аяқтады. 62 келіге дейінгі салмақта 29 қазанда өткен жұбаныш белдесуінде ол ресейлік Амина Танделовадан 2:9 есебімен жеңіліп, қола медаль үшін күресу мүмкіндігінен айырылды.
Танделова бұл салмақта бірінші нөмірмен себілген. Жұбаныш турнирінде жеңген ресейлік балуан үшінші орын үшін белдесуде нигериялық Эстер Колаволемен кездеседі. Колаволе жартылай финалда жапониялық Нонока Одзакиге есе жіберген.
Кузнецова жұбаныш турниріне Одзакидің арқасында жолдама алды. Еркін және әйелдер күресінің ережесі бойынша финалистерге жеңілген балуандардың бәрі қола үшін күресуге мүмкіндік алады. Қазақстандық балуанды 1/8 финалда жеңген жапониялық шешуші белдесуге дейін жетті. Ол кездесуде Кузнецова 0:10 есебімен жеңілді: ұпай айырмасы 10-ға жеткенде белдесу мерзімінен бұрын, техникалық басымдықпен аяқталады. Турнирдің бастапқы кезеңінде қазақстандық балуан моңғолиялық қарсыласын 4:0 есебімен жеңген еді.
Еркін, грек-рим және әйелдер күресінен әлем чемпионаты 24 қазаннан 1 қарашаға дейін Астанадағы «Барыс Аренада» өтіп жатыр. Кузнецова 25 жаста. Ол 23 жасқа дейінгі балуандар арасында екі дүркін Азия чемпионы (2022 және 2023 жылдары), сондай-ақ 2023 жылы Тиранада өткен жастар арасындағы әлем чемпионатының қола жүлдегері.
Бір күн бұрын Одзаки финалға шыққан соң қазақстандық балуан қола алуға мүмкіндік алған еді. Бұған дейін Зейнеп Баянова қола жеңіп алды: бұл Қазақстанның осы турнирде әйелдер күресіндегі алғашқы медалі болды. Ал Нилуфар Раимова үшінші орын үшін белдесуде жеңілді. Әлем чемпионаттарының үш дүркін күміс жүлдегері Жамиля Бақбергенова да жартылай финалда жеңілгеннен кейін қола үшін күреседі.
