Қазақстандық балуан Ирина Кузнецова Астанадағы күрестен әлем чемпионатында 62 келіге дейінгі салмақта сайысты жалғастырады. Оны 1/8 финалда жеңген жапониялық Нонока Одзаки финалға шыққан соң, Кузнецова жұбаныш турниріне жолдама алды. Еркін күрес пен әйелдер күресінің ережесі бойынша финалистерге жеңілген балуандардың бәрі жұбаныш белдесулеріне қатысады.
Кузнецова жұбаныш белдесуін 29 қазанда өткізеді, сессия Астана уақытымен сағат 10:30-да басталады. Оның қарсыласы — Одзакиге жеңілген ресейлік Амина Танделова. Осы жұптың жеңімпазы қола медаль үшін жартылай финалда жапон балуанына есе жіберген нигериялық Эстер Колаволемен белдеседі.
Қазақстандық балуан турнирді моңғол спортшысын 4:0 есебімен жеңуден бастады. 1/8 финалда ол Одзакиге 0:10 есебімен жеңілді: ұпай айырмасы 10-ға жеткенде белдесу техникалық басымдықпен мерзімінен бұрын аяқталады. Әлем чемпионы жапон балуаны кейін Танделованы 4:1, ал жартылай финалда Колаволені 2:1 есебімен ұтты.
Кузнецова 25 жаста. Ол 23 жасқа дейінгі балуандар арасында екі дүркін Азия чемпионы (2022 және 2023 жылдары) әрі 2023 жылы Тиранада өткен жастар арасындағы әлем чемпионатының қола жүлдегері.
Бұған дейін үй алаңындағы чемпионатта тағы үш қазақстандық балуан қола үшін белдесуге шықты. 28 қазанда Зейнеп Баянова мен Нилуфар Раимова медаль үшін күресті, ал әлем чемпионаттарының үш дүркін күміс жүлдегері Жамила Бақбергенова жартылай финалда жеңіліп, ол да үшінші орын үшін белдеседі.
