Қазақстандық балуан Зейнеп Баянова (50 кг) 27 қазанда Астанада өтіп жатқан әлем чемпионатының жартылай финалында үндістандық Ниламға 3:7 есебімен жеңілді. Үндістан өкілі финалға шығып, алтын үшін күреседі. Баянова медальдан үмітін үзген жоқ: ол қола жүлде үшін белдесуге шығады.
50 келі салмақтағы медаль белдесулері 28 қазанда өтеді. Баянованың қарсыласы жұбаныш турнирінде анықталады. Біріккен күрес әлемі (UWW) ережесі бойынша жартылай финалда жеңілген балуандар жұбаныш белдесулерінің жеңімпаздарымен кездеседі, әр салмақта екі қола медаль сарапқа түседі.
UWW әлемдік рейтингінде өз салмағында тоғызыншы орында тұрған Баянова жартылай финалға дейін екі рет жеңді. Ол 1/8 финалда өзбекстандық Актенге Кеунимжаеваны 7:3 есебімен ұтты, ал ширек финалда моңғолиялық Отгонжаргал Долгоржавтан 5:4 есебімен басым түсті.
Сол күні 57 келі салмақта Баяновамен бірге жартылай финалға Нилуфар Раимова да жетті. Финалға шығу үшін ол жапониялық Сена Нагамотомен белдеседі.
Еркін, грек-рим және әйелдер күресінен әлем чемпионаты Астанада 24 қазаннан 1 қарашаға дейін өтеді. Қазақстан құрамасы үй төріндегі жарыста грек-рим күресінен екі қола алып үлгерді: Сұлтанғали мен Құрбаев үшінші орын алды. 27 қазан күні кешке қола үшін тағы бір «классик» балуан Бағдат Сабаз күреседі. Ол үшінші орын үшін белдесуге жұбаныш турнирі арқылы жолдама алды.
Әлем чемпионатының алдында Баянова Жапонияда өткен Азия ойындарында қола медаль жеңіп алған. Бұл Қазақстанның әйелдер күресі 2026 жылғы Азия ойындарында алған алғашқы жүлде болды.
