26 қазаннан, дүйсенбіден бастап Швеция Үкімет кеңсесінің қызметкерлері жұмыс компьютерлерінде OpenAI әзірлеген ChatGPT пен Anthropic әзірлеген Claude-тың браузерлік нұсқаларын аша алмайды. Шектеу премьер-министр аппараты мен барлық министрлікке қатысты. Ведомство бұл шешімді ақпараттық қауіпсіздік талаптарымен түсіндірді.
Кеңсенің цифрландыру жөніндегі директоры Микаэль Веттеркранц қызметкерлерге арналған ішкі хабарламасында жеткізушімен ресми келісімсіз ЖИ-сервистерін пайдалану ақпаратты қорғауға қатер төндіруі мүмкін екенін жазды. Ол «ашық ЖИ-сервистерін проблемалы пайдаланудың бірнеше мысалын» келтірді. Басты қауіп мынада: қорғау келісімінсіз чат-ботқа енгізілген қызметтік деректер сыртқы серверлерде сақталып, модельдерді оқытуға пайдаланылуы мүмкін.
Тыйым салынған сервистердің орнына шенеуніктерге Microsoft Copilot ұсынылады. Кеңсе дерегінше, оған барлық қызметкердің қолы жетеді. Ведомство сервисті тексеріп, қауіпсіздік баптауларын күшейтті, ал жұмыс Microsoft пен Швеция билігі арасындағы деректерді қорғау келісімі бойынша жүреді. OpenAI мен Anthropic тіл модельдеріне шектеулі қолжетімділік мемлекет қажеттілігіне арнап жасалған Intric ішкі платформасы арқылы сақталады.
Швецияда мұндай шектеуді алғаш енгізген Үкімет кеңсесі емес. SVT және Sveriges Radio хабарлауынша, ұқсас тыйым Салық басқармасы мен Арнаулы мекемелер жөніндегі мемлекеттік кеңесте әлдеқашан қолданылып жүр, ал Сот орындаушылары қызметі өз шешімін әзірлеп жатыр. Decrypt басылымының дерегінше, Көлік басқармасының ішкі аудиті қызметкерлер жұмыста кеңінен әрі қауіпті түрде пайдаланған онға жуық ЖИ-сервисін анықтаған.
Чат-боттардағы деректер қауіпсіздігі Швециядан тыс жерлерде де талқыланып жүр. Ақпанда Еуропарламент ақпараттың қорғалуына кепілдік бере алмайтынын айтып, қызметтік құрылғылардағы кіріктірілген ЖИ-функцияларын өшірді.
