Samsung Electronics 29 қазанда рекордтық тоқсан қорытындысын жариялады. Компанияның 2026 жылғы шілде–қыркүйектегі операциялық пайдасы 107,4 трлн вонға жетті. Бұл Ұлттық банктің бағамы бойынша шамамен 36,7 трлн теңге. Samsung-тың мәліметінше, тоқсандық операциялық пайдасы 100 трлн воннан асқан әлемдегі алғашқы технологиялық компания — осы. Түсім де рекорд жаңартып, 195,3 трлн вонға жетті. Бұл алдыңғы тоқсанмен салыстырғанда 14% артық.
Пайданың басым бөлігін жад микросхемалары әкелді. Жартылай өткізгіштер бөлімшесі 147,1 трлн вон түсімнен 106,5 трлн вон операциялық пайда тапты. Жасанды интеллектке арналған дата-орталықтар жадты, соның ішінде жаңа HBM4 жадын, зауыттар шығарып үлгергеннен де тез сатып алып жатыр. Сондықтан жад чиптері нарықтың барлық сегментінде қымбаттады.
Бұл табыстың екінші жағы да бар, ол смартфон сатып алушыларға қатысты. Мобильді бөлімше желілік бизнеспен бірге 0,6 трлн вон (шамамен 205 млрд теңге) операциялық шығынға ұшырады. Ал оның түсімі жаңа бүктелетін Galaxy смартфондарының арқасында 37,7 трлн вонға дейін өсті. Samsung шығынды шығындардың көбеюімен түсіндіреді: жад — телефонның ең қымбат бөлшектерінің бірі, әрі ол смартфондардың өзінен де тез қымбаттап барады. Korea Herald мәліметінше, алдыңғы тоқсанда шығын 0,7 трлн вон болған. Яғни сатылымдағы қымбат флагмандардың үлесі артқандықтан, жағдай сәл жақсарды.
Компания шығынның бір бөлігін сатып алушыларға аударып та үлгерді. Korea Herald хабарлауынша, Samsung қазан айында Galaxy S26 сериясының бағасын көтерді: АҚШ-та 100–200 долларға, Оңтүстік Кореяда шамамен 150 мың вонға. Бұған дейін корей басылымы ETNews Samsung жадтың қымбаттауына байланысты арзан Galaxy A смартфондарын шығаруды 20%-ға азайтқанын жазған. Samsung-тың өзі жад бағасының өсуін бүкіл саланың проблемасы деп атайды.
Жыл соңындағы мерекелік маусымда компания Galaxy S26, Galaxy Z Fold8 және Galaxy Z Fold8 Ultra смартфондарына басымдық береді. 2027 жылы Samsung флагмандар сатылымы мен құрылғылардың жаңа форматтарына көңіл бөліп, мобильді бизнес пайдасының төмендеуін шектеуге уәде етті. Компанияның болжамынша, келесі жылы жад тапшылығы бұдан да күшейеді: жасанды интеллект тарапынан сұраныс ұсыныстан «айтарлықтай асып түседі», ал айырмашылық 2026 жылғыдан да үлкен болады. Бір күн бұрын жадтың тағы бір ірі өндірушісі SK hynix те осындай болжам айтқан еді. Оның бағалауынша, тапшылық 2030 жылға дейін сақталады.
Samsung Electronics — жад микросхемаларын шығаратын әлемдегі ең ірі компания әрі смартфон нарығының екі көшбасшысының бірі. Counterpoint дерегінше, 2026 жылдың екінші тоқсанында әлемдегі смартфон жеткізілімінің 23%-ы Samsung-қа, 21%-ы Apple-ға тиесілі болған. Компанияның мобильді бөлімшесі екінші тоқсанды тарихында тұңғыш рет шығынмен аяқтаған.
